Shillong, K’Lyngkot 11
Ka Khun Hynñiewtrep National Awakening Movement (KHNAM) ha ka Sngi Palei ka la ujor sha u Chief Executive Member (CEM) ka Khasi Hills Autonomous District Council (KHADC) ba ki don ki Hima kiba la buh hi ïa la ki jong ki dor na ka bynta ban ai dulir pynskhem ïa ki pata ne jaka.
Ka KHNAM ka la ujor sha ka Council ba ki don ki Hima ki bym bud satia ïa ka Khasi Hills Autonomous District (Regulation and Administration of Land) Act, 2021 haba ïadei bad ka dor ban siew ïa ka bai dulir.
Haba kren sha ki lad pathai khubor hadien ba la dep ban ïakynduh ïa u CEM, u Working President ka KHNAM u Bah Thomas Passah u la ong, katkum ka jingaibor ka Section ba 6 (8) bad section 7(2) jong ka “The Khasi Hills Autonomous District (Regulation and Administration of Land) Act, 2021” ka Executive Committee ka la pynmih ïa ka notification ne jingpynbna kaba aibor ïa u Syiem bad ka Hima ban shim ïa ka dor na ka bynta ban ai ïa ki dulir pynskhem pata.
U Bah Thomas u la ong ba katkum ka dor bai dulir pynskhem pata bad kiwei kiwei ki kot ki sla ba la buh da ka council, kata ka dor jong ka jaka kaba hapoh 5000 sq ft kan long T.2,000, 5000 sq ft haduh 10000 sq ft kan long T.3,500, 10000 sq ft haduh 20000 sq ft kan long T.7,000, 20000 sq ft haduh 1 akar kan long T.10,000, 1 akar haduh 10 akar kan long T.20,000 bad 10 akar shaneng kan long T.40,000.
Une u nongïalam ka KHNAM u la ïathuh ba watla kitei ki dei ki dor kiba la buh, hynrei na ka liang ka seng ka la ïoh ïa ka jingujor na ki katto katne ki ‘riew paidbah ba na ka liang ki Hima kim bud satia ïa kine ki jingbthah jong ka Council katkum ka aiñ, hynrei ki la buh beit la ka jong ka dor da kaba kheiñ Square Feet.
U Bah Thomas u la ïathuh ba ka jingkynduh ïa u CEM ka long ban ai jingmut ïa ka District Council ban pynthikna ba baroh naduh ki Dorbar Shnong, ki Raid, ki Hima kin bud ryntih ïa ka aiñ Khasi Hills Autonomous District (Regulation and Administration of Land) Act, 2021.
U la ong ba kane ka jingïaid lait ki Hima ka buh jingeh ïa ki trai jaka ban pynrung kyrteng (Register) ïa ki jaka puta hapoh ka District Council bad khnang ba kan ym ktah than ïa ki paidbah ban pynskhem ïa la ki jaka puta, ka KHNAM ka kyntu ïa u CEM ban shimkhia halor kane bad ban ai mynsiem ïa ki paidbah ban pynrung kyrteng ïa la ka khyndew ka shyiap sha ka Council khnang ban pynthikna bad pynskhem ïa ka jinglong trai.
