Shillong, K’lyngkot 11
Ka jingksam thliew ban thep dewbilat thymmai ïa ka bynta ba den ïa ka pung Umïam ka dang ïaid shaphrang bad yn donkam ban ksam kumba 70 tylli haduh 80 tylli ki thliew.
Ka jingmaramot ban pynkhlaiñ biang ïa kane ka jaka ba den ïa ka pung Umïam ka dei lyngba ka Dam Rehabilitation and Improvement Project (DRIP).
Na ka liang u Myntri ka tnat bording, u AT Mondal ha ryngkat u Chairman-cum-Managing Director ka MeECL, bad u Director Distribution bad uba dei u incharge Director (Generation), u Bah Moonstar Shangpliang, nalor ki ophisar ka East Khasi Hills bad Ri Bhoi district.
Ha kane ka jingleit jurip, u Mondal u la ïakren bad ki briew ka M/S ITD Cementation India Ltd ban pyntikna ba yn bud ïa ki kyndon haba pyntrei khnang ba kan don jingshngaiñ jong ka Umïam Stage-I Dam.
Ka tyllong khubor ka ïathuh ba kane ka kam ban maramot ka la sdang naduh ka pdeng bnai jong u Nohprah, 2023 bad ka bynta ba nyngkong ka dei ban ksam thliew shaduh shatrai khnang ban thep dewbilat thymmai.
Ka tyllong khubor ka ïathuh ba ka jingksam thliew ha ka jaka ba den ïa ka pung Umïam ka long kumba 70 tylli haduh 80 tylli ki thliew khnang ban pynkhlaiñ ïa kane ka jaka da kaba thep dewbilat thymmai shatrai ban pynkhlaiñ ïa ka jaka ba den bad ki bynta ba don ka dak orpait.
Kane ka jingleit u Myntri ka long ban peit bhah ïa ka jingkieng kaba ïaid ki kali bad ban tip bha kumno kane ka jingksam ka la ïaid na ka bynta ka jingshngaiñ jong ka dam.
Kaba donkam ruh ban pynkhlaiñ ïa kane ka jingkieng ka long ban bujli ïa ki bearing ha ka jingkieng (Roller Rocker Bearings).
Ïa kane ka kam la bynshet ha ka ITD Cementation bad M/S Sanrachana Structural Strengthening Pvt. Ltd, da kaba bthah ban bud ïa ki kyndon kiba la buh ryntih.
La ong ba kaei kaba donkam ka long ban kham pynbun ka ki nongpahara ha baroh arliang na East Khasi Hills bad Ri Bhoi District khnang ban pynbeit ïa ka rukom ïaid ki kali hajan jong ka dam.
Ka Sorkar Jylla ka la shim ïa kine ki lad ki lynti ban pyntikna ba kane ka jingtei kan long kaba shngaiñ.
