Tura, K’Lyngkot 12
U Lat ka jylla u la ïoh sa kawei pat ka ïing sah bad mynta ka dei ha Tura ha ka khyndew kaba don haduh 28.45 Acre bad ka jingpynlut ha ka jingtei ïa ka ïing ka long T. 24.1 klur.
Lah ban kdew ba ka ïing u Lat ha Shillong ka don ha ka khyndew kaba heh haduh 30.67 Acre, bad ka la don mynta da ki phew snem.
Ïa ka ïing sah u Lat ha Tura kaba don ha ka dong Danakgre la plie da u Lat Phagu Chauhan na Shillong katba u Myntri Rangbah bad kiwei ki kynrem ki lyndan ki la don ha kane ka ïing sah u Lat ha Tura.
La tei ïa katei ka ïing sah u Lat ha ka jinglut kaba T. 24.1 klur. Ha ka banyngkong, la saiñdur ban shna da ka ïing Assam Type na ka bynta u Lat ha Tura.
Dei ha u snem 2009 ba la saiñdur nyngkong eh ban shna ïa kane ka ïing sah u Lat ha Tura ha ka jinglut kaba T. 5.48 klur bad la thmu ban pyndep ïa ka jingshna hapoh lai snem. Hynrei la pynwan dur thymmai ïa ka ïing, bad ha u snem 2016, la hap ban pynkylla ïa ka dor jong ka jingshna bad ka por ban pyndep, bad namarkata, ka la don ka jingshlem ha ka jingshna.
Ïa kane ka projek la pynkhie im biang da u Myntri Rangbah, Conrad K Sangma, ha u snem 2021. Ki la don artylli ki ‘work order’ ba la ai na ka bynta ban pynbha ïa katei ka ïing bad ka jinglut ka long T. 10.98 klur bad T. 7.69 klur.
Da ka jinglah ban peitngor man la ka por, la lah ban pyndep lut ïa katei ka ïing hapoh lai snem.
Na ka liang u Lat u la pynpaw ïa ka jingsngewkmen halor ka jinglah ban shna ïa katei ka ïing bad u la ong ba ka long kum u maw jam na ka bynta ban pynbha ïa ka synshar ka khadar ha Rilum Garo.
U Conrad u la ong ba katei ka ïing ka dei ka projek kaba la slem bah bad ba ka sorkar ka la lah ban pyndep. U la ong ruh ba ka President ka Ri India kan wan sah ha katei ka ïing ynda ka wan sha Tura ban plie ïa ka Meghalaya Games 2024.
