Nongstoiñ, K’Lyngkot 12
Uwei u samla ba la tip kyrteng kum u Teiborlin Sangriang (26 snem ka rta) na ka shnong Nongsba, West Khasi Hills u la jah rngai bad khlem wan phai ïing shuh haduh mynta-mynne.
Ka kyrwoh khubor na u Superintendent of Police, West Khasi Hills District, ka ong ba u Teiborlin Sangriang uba dei u khun jong ka Kong Shistita Sangriang na ka shnong Nongsba u la jah na la ïing naduh ka 2 tarik u Kyllalyngkot, 2024.
Katkum ka jingtip ba la ïoh, la ong ba la ïohi khatduh ïa u ha ka 2 tarik u Kyllalyngkot, 2024 ha DSW, Upper Primary School bad haduh mynta ym pat lapdien ïa u.
Ka khubor na u SP ka ong ruh ba u Teiborlin Sangriang u don ïa ka sniehdoh kaba dum, ka dur kaba pyllun, u shñiuh baïong, ka jingjrong kumba 4 phut 8 inshi, bad ha ka por ba u jah na ïing u phong da ka T-Shirt kaba lieh bad ka jaket kaba saw, ka patlun ‘jeans’ bad ka slipar kaba don ïa ki ‘strap’ rong saw khleh rong ïong bad u dei na ka jaidbynriew Khasi.
Halor kane, u Superintendent of Police, West Khasi Hills District, u la pynmih ïa ka jingpyntip na ka bynta ban wad ïa u Bah Teiborlin Sangriang, bad lada don kino-kino kiba ïohi ne kiba ïoh jingtip shaphang jong u, kin sngewbha ban pyntip sha ki thanat kiba hajan eh jong ki bad na ka liang jong u Superintendent of Police, West Khasi Hills District, u la dep ruh ban pyntip sha baroh ki thanat jong ka Meghalaya bad ki Jylla kiba marjan na ka bynta ban wad ïa u Teiborlin Sangriang.
