Shillong, K’Lyngkot 12
Ka Bharatiya Janata Party (BJP) ka la jop kput ha ka ilekshon sha ka North Cachar Hills Autonomous District (NCHAC) Council ha Dima Hasao distrik jong ka Assam.
Ka ilekshon ka la long ha ka 8 tarik Kyllalyngkot na ka bynta ki 28 tylli ki konstitwensi jong katei ka Council.
Na kine ki 28 tylli, ka BJP ka la jop haduh 25 tylli ba kynthup ïa hynriew tylli ki konstitwensi kiba khlem don ki nongïakhun pyrshah. Kine ki dei ki ‘result’ kiba la dep ban pynbna haduh ka 8 baje mynmiet jong ka Sngi Thohdieng. Nalor ka BJP, ki la don ruh arngut ki kyrtong khlem seng kiba la jop.
Katkum ki khubor, ka la don ka jingïakhun ha kawei ka konstitwensi ha kaba u kyrtong ka BJP u la jop tang da shi ‘vote’. Kane ka dei ka jingïakhun hapdeng u Ratan Jarambusa jong ka BJP bad u Pronen Haflongbar, uba dei u kyrtong khlem seng, na Kalachand konstitwensi.
Ka BJP ka la thaw ïa ka Executive Committee ha katei ka Council ha u snem 2019 hadien ba la jop 19 ngut ki dkhot. Ha uto u snem, ka Congress ka la jop ha ki ar tylli ki konstitwensi bad kiwei da ki kyrtong khlem seng.
