Shillong, K’lyngkot 12
U President ka Khasi Students’ Union (KSU) Sengkmie, Bah Lambokstarwell Marngar, u la ong ba ka dei ka jingstad ka Sorkar Jylla bad ka Sorkar India ban pynurlong ïa ka jingïakren ïasuk bad ka seng HNLC.
“Ngi khmih lynti ba ka jingïakren ïasuk ka HNLC bad ka Sorkar Jylla bad Sorkar India kan urlong noh shen hynrei mar shu mih u snem thymmai ngi shu ïohi ba ka HNLC ka la weng noh na ka miej ban ïakren ïasuk” u la ong.
U la ong haba ka HNLC ka la wan sha ka miej ban ïakren ïasuk, ka sorkar ka la dei ban thaw ki lad ki lynti ban ïahunlang hynrei ka sorkar kam shah shkor ïa ka jingdawa ka HNLC.
Nalor nangta, u Bah Lambokstarwell u la ong ba kum u nongïalam ka KSU um kwah ban ong eiei hynrei tang ka jingkyrpad ïa ka sorkar ba kan shimkhia ban shah shkor ïa ka jingkwah ka HNLC.
U la ong kumba ki paidbah ki la thrang ïa kane ka jingïakren ïasuk, ka sorkar ka la dei ban shimkhia ïa ka jingdawa ka HNLC.
Shuh shuh u la ong ba ka jingweng ka HNLC ïa ka jingïakren ïasuk ka pyni ba ka Sorkar kam don ïa kata ka mon, hynrei kam don kano-kano ka jubab wat lada ka HNLC ka la pyni ba ka la weng ïa ka jingïakren ïasuk.
Namar kata, u la kyntu ïa ka Sorkar Jylla bad Sorkar India ba kan shimkhia ïa kane ka jingïakren ïasuk bad ka seng HNLC.
Kum ban shu pynkynmaw ki nongïalam ka KSU ki la leit ïakynduh ïa ki nongïalam ka HNLC haba ki wan sah sha Meghalaya haba ka dang ïaid ka jingïakren ïasuk bad ka Sorkar Jylla bad ka Sorkar India.
