Shillong, K’lyngkot 12
Ka Sorkar Jylla ka lah ban shimpor haduh u Lber mynta u snem ban ïoh ïa ka kompani thymmai ka ban pynïaid bad ai jingshakri haba ïadei bad ki kam kiba donkam kyrkieh ban ïoh jingsumar (emergency response services) lyngba ki 108 Ambulance ha kane ka Jylla.
Kane ka jingshimpor ka dei namarba ka Sorkar Jylla ka hap ban khot ‘tender’ biang sa shisien na ka bynta ban jied kawei ka kompani napdeng kiba bun kiba ïashim bynta ha ka ‘tender’.
Ka Myntri ka tnat ka koit ka khiah, ka Kong Ampareen Lyngdoh ka la ong ba ka tnat ka koit ka khiah ka kyrmen ba yn lah ban pyndep lut ïa baroh ki kam kiba ïadei bad ka ‘tender’ kaba khot biang mynta, bad ban jied ïa ka kompani bathymmai ha u Lber mynta u snem.
Haba batai shaphang ka jingdonkam ban khot ‘tender’ biang, ka Myntri ka la ïathuh ba ha ka por ba don ka jingïalang hapdeng ki nongthep ‘tender’, la ïoh jingtip ba ka don ka kynrum-kynram haba ïadei bad ki kot ki sla jong kiba thep ‘tender’.
“Hadien ba sngewdei ba ka tnat ka koit ka khiah ka la phah ïa kane ka kam sha ka tnat aiñ ba kan peit bniah bad ai jingkynthoh bad jingai jingmut kumno ban leh. Kumta halor ka jingkynthoh bad jingai jingmut ka tnat aiñ la rai ban pyndam noh ïa ka ‘tender’ kaba nyngkong bad yn khot ‘tender’ biang kham kloi,” la ong ka Kong Ampareen.
Ka ‘tender’ banyngkong la khot ha u Nailar 2023 bad ka thong ka long ban pyndep noh ban jied ïa ka kompani kaba thymmai hapoh u Nohprah 2023.
Ha ka jingshisha ki la don 7 tylli ki kompani kiba thep ‘tender’ bad kine ki kynthup ïa ka Emergent Global Services, Kubera Solutions Pvt Ltd, Pashupatinath Distributors Pvt Ltd (PDPL), Ziquitza Healthcare Pvt Ltd, Medulance Healthcare Pvt Ltd, Jai Ambe Roadline Pvt Ltd bad Kria Healthcare Pvt Ltd.
