Shillong, K’lyngkot 12
Wat la ki nongtrei ka Jaiñtia Hills Autonomous District Council (JHADC) ki shah set tulop haduh phra bnai kynthih hynrei ka Secretary jong ka Executive Committee ka la pynmih hukum ba baroh ki nongtrei kin hap ban poi sha shlem treikam hapoh ka por 10:30 mynstep mar shu sdang u snem thymmai.
Haba ïakren bad u President ka Jaiñtia Hills Autonomous District Council Staff Association, Bah Johnson Pohrmen, u la ïathuh haba ki nongtrei ki la leit ai da ka mukotduma sha ka ïingbishar Meghalaya High Court halor ka jingpynslem ban siew tulop ka shlem treikam JHADC, ka la pynmih pynban ïa ka hukum baroh ki nongtrei mar shu sdang u snem thymmai kin hap ban poi sha shlem treikam hapoh ka 10:30 mynstep bad pynpoi ïa ka kot lum kyrteng (register) hapoh ka 11 baje mynstep ha kamra ka Secretary.
U la ïathuh ba nalor ba la set tulop haduh phra bnai, ki nongtrei kim lah shuh ban sah sha sor ki hap ban sah sha ki shnong namar bym lah siew shuh ka bai wai, bad kane ka la buh jingeh namar ki hap poi slem sha shlem treikam lada jur sa ka jingdheng kali.
Nalor nangta, u la ïathuh ba kum ki nongtrei kim lah ban shu ïakhih namar kan ktah ïa ka jingdonkam jong ki paidbah. Kumta kim banse ban leit ai mukotduma ban ïoh ïa ka jingbishar kaba hok namar ka jingduh tulop.
Nalor kata, u la pynkynmaw haba ki nongtrei ki sdang ïa ka jingïakhih ha u Naiwieng 2023, ka Secretary ka la kular ban siew noh ïa ka tulop ha u Naiwieng; hynrei ha u bnai Nohprah ka la siew tang ar bnai bad ka tulop ka dang sahkut sa phra bnai.
U Bah Johnson u la pyntip ba ka ïingbishar kan sa shim jingbishar ïa ka mukotduma ha u bnai ban wan.
