Jowai, K’Lyngkot 12
Ka Sub-Center Tornado Security Agency kaba don ha ka shnong Umdeinlin, West Jaiñtia Hills District ha ka Sngi Thohdieng ka la sam syrnod sha ki 61 ngut ki samla shynrang bad kynthei kiba la pyndep ïa ka jingshah hikai kaba 45 sngi ban long ki nongap pahara ne ‘Security Guard’.
Na ki 61 ngut ki samla kiba don hapdeng ka rta 18 haduh 40 snem, 23 ngut dei ki kynthei, 38 ngut ki shynrang bad la ai jinghikai da ki 2 ngut ki nonghikai ba tbit kiba kynthup ïa u Bah Yooluti Pakma bad Kong Ferdina Muksor.
Hashuwa ban sam syrnod sha ki 61 ngut ki samla, la don ka jingïalang ba la pynïaid da u Camp Commander & Training In-charge uba dei ruh u trai jong kane ka shlem ai jinghikai, u Bah Pyndaplang Muksor, ha ka jingdonlang u Bah Winning G. Sungoh, MDC JHADC kum u kongsan, u Rev. Samuel Myrphet, u Waheh Shnong Umdeinlin Bah Nangai Sutnga, ki bahaïing hasem jong ki samla, ki katto-katne ki nongïalam shnong nalor kiwei-kiwei kiba shah khot sngewbha.
U Bah Pyndaplang Muksor ha ka jingkren u la ïathuh ba u ju trei kum u pulit (Battalion) naduh 2008 hynrei u la iehnoh ïa kane ka kam bad wanrah da ka shlem ai jinghikai khnang ba ki samla kin ïoh lad ban trei ha ki kam bapher-bapher.
U la ong ba lyngba ka syrnod, ki samla ki lah ban ïoh kam ïoh jam bad long ki nongap pahara ha ki ophis treikam Sorkar, Hospital, ki dukan heh (Mall), ki Bank, nalor kiwei-kiwei.
U Bah Winning G. Sungoh ha ka jingkren u la ïaroh ïa ka sienjam jong u Bah Pyndaplang Muksor bad u la ai ka jingkitbok kitrwiang ba un nangïaid shakhmat ha kane ka kam khamtam ha kum kane ka juk kyrduh kam kyrduh jam ki samla.
“Ka jinghikai kaba phi ïoh na kane ka shlem hikai kam dei ka jingkut, hynrei ka dei ka jingsdang jong ka lynti ïaid jong ka jingim jong phi. Ka por ka la dawa ba phin kyrshan ym tang ïalade hynrei ïa ka ïing ka sem ruh kumjuh,” la ong u Bah Sungoh.
U la bynrap, “Ka syrnod ba ki samla ki ïoh pdiang ka dei ka waitlam ban pynshisha ba ki long kiba bit pura ban long ki nongap pahara.”
U Rev. Samuel Myrphet u la pyntian smai ïa ki 61 ngut ki samla kiba la pyndep ïa ka jingshah hikai bad ha kajuh ka por u la kyntu ban long ki samla kiba shlur, kiba shaniah ha U Blei, kiba treihok bad ïeng skem ha ka nongrim.
La pynphuh ïa kane ka sngi da ka jingïashim bynta ki 61 ngut ki samla ha ka jingïaid ‘March Pass’, ki jingrwai bad jingshad pynbyrngia bad ka ‘Drill’.
