Jowai, K’Lyngkot:
Ki pulit jong ka West Jaiñtia Hills District ha ka jingkhynra ïa ki kali ar shaka, ki la ïoh ban pynjot ïa ki Silencer ba ïoh kurup na ki 9 tylli thuk-thuk kiba la pyndait beaiñ.
U Superintendent of Police ka West Jaiñtia Hills District u Chephang Syrti ha ka kyrwoh ba u la phah, u la ong ka jingpyndait ïa ki ‘Silencer’ ha ki thuk-thuk ka pynmih ïa ka jingsawa kaba jam bad ka long pyrshah ruh ïa ka aiñ Motor Vehicle Act.
U la pyntip ruh ba kane ka jingkhynra la sdang ha ki artaïew da ki pulit pynïaid kali ka district bad yn bteng ruh ha ki sngi ban wan. Namar kata, u la kyntu ïa ki nongñiah thuk-thuk ban bud ïa ka aiñ Motor Vehicle Act.
