Shillong, K’lyngkot 12
Ka University Grants Commission (UGC) ka la weng noh ïa kawei ka skulbah shimet kaba don ha nongbah Shillong kaba kyrteng ka Techno Global University namarba kane ka skulbah kam pat sdang satia ïa ka jingai jinghikai wat hadien bun snem ba la seng ïa ka.
Kane ka skulbah ka ju pyndonkam ïa kawei ka ïing jong ka Shillong Polytechnic ha Mawlai kum ka shlem treikam jong ka ha kine ki snem ba la leit.
Kane ka skulbah ka dei kaba la seng hadien ba la mynjur ïa ka aiñ ha Ïingdorbar Thawaiñ ka Jylla.
Ha ka jingshisha, ka UGC ka la pynrung ha u snem 2013 ïa ka Techno Global University ha ka thup jong ki skulbah.
Hynrei ha ka byrta paidbah (public notice) jong ka UGC kaba la pynmih ha ka 27 tarik Nohprah 2023, la ong ba ka tnat pule puthi ka Sorkar Jylla ruh lyngba ka shithi kaba 27 tarik Nailur, 2022 ka la ai jingmut ban weng noh ïa ka Techno Global University na ka thup jong ka UGC haba ïadei bad ki skulbah.
Ka UGC ka la pynskhem shuh shuh da kaba pynshong nongrim ruh na kaei kaba la thoh hi da ka Techno Global University ha ka website jong ka ha kaba ka la pynpaw ba “ka Techno Global University, Shillong, kam pat ju sdang ïa ka jingai jinghikai naduh ba la seng ïa ka. Ngim pat ju ai kano-kano ka syrnot bad degree ïano-ïano bad ngim pat ju aibor ruh hano-hano lane ka jaka pule ban leh kano-kano ka kam ha ka kyrteng jong ngi.”
