Shillong, K’lyngkot 12
Ka Sorkar Pdeng lyngba ka tnat Tribal Affairs ka la pyntip ba ka la mang bad pyllait pisa jong ka bynta ba-ar (second installment) kaba dei ka baibam (scholarship) ki samla pule ka Jylla hapoh ka skhim ‘post matric scholarship.’
Ïa kane la ïathuh da u Myntri Rangbah u Conrad K Sangma kumjuh ruh u Myntri ka tnat pule puthi u Rakkam A Sangma ha ka sngi Thohdieng.
U Conrad u la buh ïa ka shithi ha social media ‘X’ jong u kaba la phah da ka tnat Tribal Affairs bad na ka liang u Myntri ka tnat pule puthi pat u la kren sha ki lad pathai khubor halor ka jingmang bad pyllait ka Sorkar Pdeng ïa kane ka pisa kaba dei ka baibam ki samla pule ka Jylla.
Haba batai shaphang ka jingpyllait pisa ka Sorkar Pdeng lyngba ka tnat Tribal Affairs jong ka bynta ba-ar (second installment) ka baibam ki samla pule kaba tip kum ka Post Matric Scholarship scheme, u Rakkam u la ïathuh ba katkum ka shithi kaba dei ka 12 tarik Kyllalyngkot, 2024, ka Sorkar Pdeng ka la pyllait 41 klur, 25 lak tyngka ïa kane ka baibam ki samla pule ha ka bynta ba-ar.
U Rakkam u la ong ba baroh ki samla pule kiba dei ban ïoh ïa ka baibam jong u snem 2022-2023 ki don kumba 67 hajar ngut bad ïa ka bynta ba nyngkong (first installment) la dep pyllait ha ki khyndiat bnai ba la dep na ka bynta kumba 37 hajar ngut ki samla pule bad kiba dang sah mynta kin ïoh ha kane ka bynta ba-ar.
U Rakkam u la pynshai ruh halor ka jingdon kiba kynnoh ba ka Sorkar Jylla ka pynskhem ban pyllait ïa ka scholarship, da kaba ong ba kane ka scholarship scheme ka dei kaba la pyllait pisa da ka Sorkar Pdeng lyngba ka tnat Tribal Affairs, bad kam don satia ka jingpynslem na ka liang ka Sorkar Jylla.
U la ong ba hadien ba la mang bad pyllait pisa ka Sorkar Pdeng, ka Sorkar Jylla kan sa leh kloi katba lah ban phah ïa kane ka baibam sha ki samla pule kiba dei hok ban ïoh ha ka taïew ban wan.
U Rakkam u la ai khublei ruh ïa u Myntri ka tnat Tribal Affairs ka Sorkar Pdeng bad u Myntri Rangbah na ka bynta kane ka jingmang bad pyllait pisa ka Sorkar Pdeng.
Haba kyntu ïa ki samla pule ban pynleit jingmut ha ka jingpule, u Rakkam u la ong ba ki samla ka Jylla ki long kiba lah ban ïakhun bad ki dei ban don ka thong bad jingkut jingmut namar ka Jylla ka donkam ban ïoh bun ki ophisar ki ban shakri ïa ka Jylla.
Une u Myntri u kyntu ruh ïa ki nonghikai ban shimkhia ban ai ka tynrai jong ka jinghikai kaba bha tam na ka bynta ki samla pule ka Jylla.
