Jowai, K’Lyngkot 12
“Wat sngewtynnad ba phin ïoh tang ka jingim kaba suk, kaba jai-jai, ka bym don ka ‘erïong, sngewtynnad haba wan ki ‘erïong ha ka jingim, namar ka ïarap ban long u nongïakhun uba jop.”
Ïa kane la ong da u President ka Voice of the People Party (VPP), u Bah Ardent Miller Basaïawmoit, uba dei ruh u MLA ka Nongkrem ha ka Sngi Thohdieng haba wan ai mynsiem bad kitbok kitrwiang ïa ki 61 ngut ki samla shynrang bad kynthei kiba la pyndep ïa ka jinghikai ban long nongap pahara ne ‘Security Guard’ ha ka shlem ‘Sub-Center Tornado Security Agency’ kaba dei trai da u Bah Pyndaplang Muksor kaba don ha ka shnong Umdeilin, West Jaiñtia Hills District.
“Bun napdeng jong ngi, ngi shaniah beit tang ha ka kam Sorkar, ngi sngew ba lada ym ïoh kam Sorkar, ym don da kawei pat ka kam, hynrei une u samla rangbah u pyni da kaba kam da kaba u iehnoh ïa ka kam Sorkar ban sdang pat da kane ka kam ym dei tang ban im ïalade hynrei ban thaw kam ruh ïa kiwei,” la ong u Bah Ardent.
U la ong ban seng ïa ka shlem hikai hap ban mad shibun ki jingeh, khamtam ha kine ki sngi, kiba kata ka jingïakhun, ka jingïaksaid ban ïoh ïa la ki kam ka la long kaba shyrkhei kat haduh ban hap ban ïaknieh.
“Ngi ki nongïalam ka VPP ngi wan ban ai mynsiem lem bad ruh kaei kaba ngi lah ban leh ngin leh, hynrei ngim wan pat ban kular, namar ngim dei ki nongïalam kiba sngewtynnad ban kular,” la ong u Bah Ardent.
Nalorkata, u la kyntu ruh ïa ki samla da kaba ong, “Wat ai ba ki jingeh kiba ïakynduh ha ki 45 sngi kin pynlong ïa phi ban phai dien noh, dei ban don ka mynsiem satar bad ym ban ieh ïa kano-kano ka kam shiteng lynti.”
Ha kaba ïadei bad ka synshar-khadar u ïathuh, ba la sdang ïa ka jingïalap ban wanrah ïa ka synshar-khadar kaba khuid naduh u 2010.
“Ki don shibun ki jingkynthoh jingkren hynrei ngim pynsngap, ngi ïaid shakhmat bad kumba long mynta, sngewtynnad ba ki paidbah kylleng ka Jylla ki sdang sngewthuh ïa kata ka jingmyntoi kaba kin ïoh lyngba ka synshar-khadar kaba khuid,” la ong u President.
Utei u nongïalam u la ong ruh, “Ngim ju sngap ïa ka jingpynrem, jingkren beiñ jong ki briew, hynrei ngi sngewthuh kaei kaba ngi leh ka dei na ka bynta ka bit ka biang bad ka jingmyntoi jong ki longdien mandien kumjuh ki hep barit kiba long ki persara jong ka jaidbynriew.”
Shuh shuh u la kyntu ba kajuh ka rukom pyrkhat ka dei ruh ban rung ha ki 61 ngut ki samla bad haba ïakynduh jingeh ha ka jingim kim dei ban sngew ba dei tang ma ki kiba mad jingeh.
“Haba mad ïa ki jingeh, ka pynmih ïa ka mynsiem ïakhun bad long nongjop,” u la ong.
