Shillong, K’Lyngkot 12
Ka kyrtong jong ka National People’s Party (NPP) na Shillong Parliamentary konstitwensi, kaba long ruh ka Myntri ka Sorkar Jylla, ka Dr. M. Ampareen Lyngdoh ka la ong ba kan kren da ka Ktien Hindi ban ïatai ïa ki mat bapher-bapher jong ka jaidbynriew hapoh ïingdorbar Parliament.
“Ngan leit sha ki jaka bapher-bapher ban ïohi ïa ki jingdonkam bad jingdawa ba hakhmat eh. Ngan ïoh lad ban ïakren ban sngap ïa ka jingud-jingnam jong ki nongshong shnong,” la ong ka Dr. Lyngdoh haba kren sha ki lad pathai khubor ha ka Sngi Thohdieng.
Ha ka jingïakynduh jong ka bad ki paidbah, ka kyrtong ka la ong ba kan buh jingthoh khnang ba kan ithuh ïa ki kynhun na ki shnong bapher-bapher.
Haba pynsngew ïa ki mat ba kan rah hapoh ïingdorbar Parliament lada ka poi sha ka thong ha kane ka ilekshon MP ban wan, ka Dr. Lyngdoh u la ong, “Kaba nyngkong ka long ban pynkhlaiñ, pynkhreh bad ïasaid na bynta ka jingpynbha ïa ki jaka ai jingsumar. Kaba ar ka long ban pynkhlaiñ ïa ki lad pynïasoh la ka long ka surok, juk stad teknoliji, ban pynkhlaiñ ïa ki Dorbar Shnong, SHG, ka rep ka riang bad kiwei-kiwei.”
Ha kajuh ka por, ka la ong ba kam don ïa kano-kano ka saiñdur na bynta ka ilekshon ban wan hynrei kaei kaba kan leh ka long ban shimti ïa ka kam, ban leit wad ïa ki shnong ki thaw, ban tip ïa ki jaka bad ki jingeh jong ki, kumjuh ban wad ïa ki paidbah kiba kloi ban trei mon sngewbha na bynta ka roi ka par jong ka jaidbynriew.
“Ngi dei ruh ban ïakhun ban pynïoh ïa ka Ktien Khasi, na bynta ka jingithuh ïa ka Meghalaya kum ka Jylla kaba kren la ka jong ka ktien, kaba don la ka riti-dustur. Ngin hap khmih ruh ban pynkhlaiñ ïa ka Khyrnit ba hynriew …ka bniat jong ka Khyrnit ba hynriew, ngim dei lano-lano ban pynluiñ bad ngi dei ban bat ïa kata,” ong ka kyrtong ka NPP.
Shuh shuh ka la bynrap ba kan pynsngew ïa ka mat ban ithuh ïa baroh ki jait niam hapoh ka ri bad ym dei ban pynbor ne pynmih ïa kino-kino ki jingbyrngem jingbyrsit haba ïadei bad ka jingpynkylla niam.
“Ngi dei ki nong India bad ha ka por ba ki longshuwa-manshuwa jong ngi ki leit ban soi ïa ka soskular ban long kawei bad ka India, kim shym leit kum ka shakri, ki leit kum ki trai bad ngi dei ban long ki trai ha kano-kano ka rai ba shim ba ïadei bad ka Jylla. Kine baroh ki dei ki kamram jong ki MP,” ka la ong.
Nalor kane, ka Dr. Lyngdoh ka la ong, “Katei (Parliament) ka dei ka jaka pdeng jong ka jingïatai nia ïa kine ki mat, ban pyrta shla, ban ong eh bad ban kren jam. Lada nga hap kren da ka Hindi ruh ngan kren da ka Hindi, ym lah ban ong ‘nga te ngam kren’, tangba haba phi wan sha shnong jong nga pat, wat wan kren da kata ka ktien.”
