Shillong, K’Lyngkot 12
Ka sorkar u Conrad K Sangma ka don jingthmu ban tei ïa 700 tylli ki shlem ha kaba ki paidbah ki lah ban leit wad jingïarap na ka bynta baroh ki jait jingdonkam.
Ïa kane, la pynbna da u Myntri Rangbah ha Tura ha ka por ba la plie ïa ka ïing sah u Lat, u Conrad u la ong ba ïa kitei ki 700 tylli ki shlem yn tip kum ki ‘CM Citizen Service Delivery Centre’ ha kaba ki nongshong shnong ki lah ban leit rung bad ban wad jingïarap na ka bynta baroh ki jait jingdonkam.
Hynrei u khlem pat batai shai ha kino ki jaka yn tei bad katno ka jinglut kan long na ka bynta kitei ki shlem treikam.
Ha kajuh ka por, u Conrad u la ïathuh ba ka sorkar ka nang pynkhlaiñ ïa ka jingbuh ïa ki shlem treikam ha ki thaiñ bapher-bapher ka jylla.
U la ong ba la dep ban shim rai na ka bynta ban pynkynriah ïa ka Secretariat bad kiwei pat ki shlem treikam jong ka sorkar sha Mawdiangdiang. Nalor ka Secretariat, yn shna ruh ïa ki jaka sah na ka bynta ki nongtrei sorkar bad kiwei ki shlem.
Ha Tura, yn shna ïa ka “Integrated Administrative Complex” ha kaba yn buh ïa baroh ki shnat treikam jong ka sorkar. Ha Jowai, u la ong ba la sdang ka jingshna ïa ka “Integrated Administrative Complex” ha ka jinglut kaba T. 19.83 klur.Nalorkata, ka kam ban nang pynbha ïa ki shlem treikam jong ki Deputy Commissioner bad ki shlem treikam jong ki Block ka la ïaid.
U la ong ba kitei ki 700 tylli ki shlem ryngkat bad kiwei pat ki shlem treikam jong ka sorkar kin nang pynbha ïa ka jingai jingshakri sha ki paidbah bad ban kyntiew ïa ka synshar ka khadar.
