Imphal, K’Lyngkot 14 (UNI)
Ka ‘Bharat Jodo Nyay Yatra’ ka la sdang na Thoubal, Manipur ha ka Sngi U Blei ha ryngkat ka jingpynsngew na u President ka Congress, u Mallikarjun Kharge bad khlieh nongïalam barim ka seng, u Rahul Gandhi ban pynkut noh ïa ka saiñ pyrthei jong ka jingisih bad jingïakynad bad ban sdang ïa ka saiñ pyrthei bathymmai jong ka jingïatai bad jingsngewthuh.
Da ki hajar ngut ki la ïashim bynta ha katei ka jingïaid paidbah watla ki bor distrik ka Thoubal ki la pynmih hukum ban pynduna ïa ka jingïalum paidbah sha ka 3000.
U Gandhi u la leit ban leh burom ha Khongjom War Memorial kaba la tei kum ka dak ban kynmaw burom ïa ki ‘riewshlur jong ka Anglo Manipur, 1891, ha shuwa ban sdang ïa ka ‘Yatra’ ïa kaba la pynbeit ban pyndep ïa kumba 6,200 km hapoh 66 sngi.
Utei u MP ka Wayanad u la ïathuh ba u la wan jngoh teng ïa ka Manipur ha shuwa bad sakhi ïa kaei kaba um pat ju sakhi mynno-mynno ruh ha ka sien banyngkong.
“Nga la sakhi ha ka sien banyngkong hadien ba nga pynïasoh sha ki kam saiñ pyrthei ïa ka jingkhyllem ka synshar-khadar. Kam dei shuh ka Manipur kaba ngi ju tip, da ki lak ngut ki paidbah ki la shah ktah bad ki briew ki la ïap,” u la ong.
U Gandhi u la kynnoh ba ka BJP bad RSS kim shym la sngew ïa ka jingjynjar jong ki paidbah ka Manipur. Haba pynkynmaw ïa ka ‘Bharat Jodo Yatra’ kaba ha shuwa, utei u President barim ka AICC u la ong ba u la ïaid 4000 km bad kren halor ka jingïatylli jong ki paidbah, da kaba weng ïa ka jingbym shaniah.
“Ka long kaba eh hynrei kaba jop. Ka ‘Yatra’ kaba sdang mynta ka sngi kan dei kaba ïakhleh lang da kaba pyndonkam ïa ka kali kumjuh ka jingïaid kjat,” u la ong.
Namar ki kam saiñ pyrthei, ka nongrim bad ka jingisih kaba ka BJP bad ka RSS ki la pynsaphriang, ka Manipur ka la sakhi ïa ki jinglynshop.
“Ngin sa wad ïa kaei kaba phi la jah bad ngin sa pynneh biang,” u la ong sha ka jingïalang.
U Gandhi u la ong ruh ba u sngewthuh ïa ka jingpang, ka jingsngewsih kthang halor ka jingduh noh bad kular ban wanrah biang ïa kaei kaba ki paidbah ka Manipur ki kheiñ kor eh.
Hashuwa, haba ai jingkren ha ka jingïalang plie hadien ba la pyllait ïa ka kali na bynta ka ‘Yatra’, u Kharge u la ong ba u Myntri Rangbahduh ba nyngkong eh ka ri, u Jawaharlal Nehru u la batai shaphang ka Manipur kum u mar kordor ka India naba dei ka Congress kaba la mynjur kylluid mynsiem ïa baroh ki jingdawa jong ki paidbah.
Ka Congress bad u Rahul Gandhi ki ïakhun na bynta ki paidbah bad ka dei ka jingïakhun kaba la slem bah, u la ong da kaba kyrpad ïa baroh ban burom ïa ki 4 tylli ki païa ka Riti Synshar ka ri.
Utei u khlieh nongïalam ka seng u la ong ruh ba kaba kum kane ka ‘Yatra’ kam pat ju jia hapoh ka ri. U la ong ba u Myntri Rangbahduh ka ri, u Narendra Modi u la wan ban khroh ‘vote’ hynrei haba ki paidbah ka Manipur ki mad jingeh, um shym la wan jngoh ïa ka Jylla.
“Ngi dei ban ïakhun ïa ki mat ban ïada ïa ka Riti Synshar ka ri hynrei ym ban pynshit ïa ki paidbah halor ki mat ba ïadei bad ka niam. U Myntri Rangbahduh u la kren shaphang u blei Ram hynrei ki kam jong u ki ïapher,” ong u Kharge.
U la pynkynmaw ruh ba ha ka Dorbar Tlang ba dang shen, 146 ngut ki MP ki la shah sospon.
“Da kaba weng lut ïa baroh, ki kwah ban mynjur ïa ki aiñ, la sakhi ïa ka jingleh donbor ban pynkut ïa ka synshar paidbah,” ong u Kharge.
“U Rahul Gandhi u kwah ban pynïoh ïa ka hok na bynta ki paidbah ka Manipur. Balei u Myntri Rangbahduh um lah ban wan sha Manipur lada u lah ban leit jngoh ïa ka jaka shyïap harud duriaw (ha Lakshadweep),” u la buh jingkylli.
Shuh shuh u la ong ba kane ka jingïaid paidbah ka long ban kyrsiew thiah ïa ki nongshong shnong ka Manipur bad pynsngewthuh sha ki halor ka ïoh kam ïoh jam, kam ïalehkai bad ka pule-puthi ïa kaba ka Sorkar Pdeng kam pyrkhat ïa kane ka bynta.
Katei ka jingïaid paidbah kan kut ha Imphal bad kan ïaid lyngba ka Kangpokpi bad Senapati distrik ha ka Lah Sngi U Blei shuwa ban leit pat sha Nagaland.
