Shillong, K’Lyngkot 14
Ka nongbah Shillong ka dei kawei na ki nongbah barit ha India kaba ju bna nam kum ka jaka kaba itynnad.
Hynrei katba nang ïaid ki sngi ki snem, ki briew ki la nang roi bad ki jaka sor ha Shillong ki la nang ïar bad ka jingsngew -thuh briew ban pynneh ïa ka khuid ka suba ha shnong ha thaw kam don shuh.
Katkum ka Swachh Survekshan Award kaba dei ka jingpeit bniah ïa ka jingkhuid ki jaka kaba la pynlong ha baroh kawei ka ri da ka Sorkar Pdeng. La ai kyrdan ïa kiba bun ki nongbah kiba don ha ki Jylla bapher bapher da kaba peit ïa ka rukom lum ïa ki jaboh jabaiñ, jingbret pathar ïa ki jaboh bad jingkhuid jingsuba ha ka liang ki jaka leit bar, jingkhuid ka umbam umdih bad kiwei kiwei.
Ka nongbah Indore bad Surat ki la ïoh ïa ka nam ha jingkhuid jong ka nongbah.
Ka Shillong kam kot shano-shano ha ka jing-khuid bad katba nang mih ki sngi, da ka jingnang roi ki plastik, ki shnong ki dong ki la nang jaboh bad dap da ki plastik ha lynti syngkien.
Man u snem ha ki bnai tlang, bun ki Dorbar Shnong ki ju pynlong ka jingkhuid shnong kaba shisien shisnem. Pynban kane ka jingpynkhuid shnong ka dei tang ka rongphong shisngi. Tang mar ïa dep pynkhuid, ki nongshong shnong hi ki la bret plastik, bitor kyiad bad kiwei kiwei ki jingpynjaboh.
Man la ki khep, ngi ju kynnoh ïa ka Sorkar lada ka Jylla bad ka nongbah ka poi shatrai ha ka jingïoh kyrdan.
Ka jingkylli ka long, mano ba pynjaboh ïa ka nongbah Shillong? Hato dei ka Sorkar kaba pynjaboh ne dei ki nongshong shnong kiba leh bym salia ban sumar khuid ïa ka.
Ka jingkitkhlieh ka dei hi jong baroh ki nongshong shnong ban pynneh ïa ka khuid ka suba ha shnong ha thaw khamtam eh ban kiar na ka jingbret pathar ïa ki plastik ki kot bad kiwei kiwei jingpynjaboh kiba ktah ïa ka mariang.
Ka nongbah Shillong naduh ka wah Umkhrah bad Umshyrpi ki la kup ïa ka dur kaba jaboh lynter mynta la bun phew snem. Kam dei na kano-kano ka daw, hynrei ka jingleh bym suidñiew hi u khun bynriew. Ka Sorkar kan nym lah leh ei ei lada ka mon kam don na ki nongshong shnong ban ri bad sumar ïa ka la ka jong ka shnong bad ka nongbah ban pynlong kaba khuid ba suba.
Ki shnong ki thaw ki don la ki jong ki kali kit ñiut hynrei ka jingjaboh ka nang jur. Kumta lada ym don ka jingkitkhlieh jong baroh ki nongshong shnong, ym lah ban wanrah jingkhuid bad sa tang khyndiat snem ka umbam umdih ruh lehse la shem shitom ban ïoh namar ym don jingñiewkor ban pynneh pynsah bad sumar khuid wat ïa ki um ki wah kiba pyndap ïa ka jingdonkam um u khun bynriew.
