Shillong, K’Lyngkot 14
U Professor ka Delhi University (DU), u Dinabandhu Sahoo, ïa uba la tip ruh kum u nongseng ïa ki tamasa dienglieng ne ‘Cherry Blossom’ ha India u la ïoh pdiang ïa ka khusnam ‘Top Sustainability Laureate Award’ jong u snem 2023 halor ka jingsynñiang jong u sha ka bynta ba ïadei bad ka ‘Sustainable Development & Climate Change’.
Une u Director barim ka Institute of Bio-resources & Sustainable Development (IBSD), jong ka Sorkar India kaba ha Manipur u la ïaid shakhmat ban ïalap ïa ka dawbah na bynta ban pynneh-pynsah ïa ki jingdon-jingem mariang bad ha ka liang ka Bio-resources Management ha ki shnong ki thaw la ka long ha ka thaiñ ki lum Makashang kumjuh ha ki Jylla ka ri kiba don harud duriaw.
U Sahoo uba long ruh u Director nongseng jong ka Centre for Himalayan Studies, u la sdang ban shimkhia ïa u dienlieng ha ka Thaiñ Shatei Lam Mihngi jong ki Makashang, ha kawei ka liang kaba la ïalam sha ka jingjop jong ki tamasa dienglieng bad ai mynsiem ïa kiba bun ban ïada ïa ki jingdon-jingem mariang.
Katei ka jingpyrshang jong u ha kajuh ka por ka la ïalam sha ka jingthung ïa kumba 60,000 tylli ki dienlieng ha kylleng ki Jylla ka Thaiñ Shatei Lam Mihngi.
Dang shen, ki ‘riewstad saïan ki la ai nam ïa uwei u jait dienlieng bathymmai ha ka kyrteng jong u – Prunus Dinabandhuana.
U Sahoo uba long ruh u samla pule banyngkong eh ka India ban leit jngoh ïa ka Antarctica kumjuh ïa ka Arctic, u la ong ba namar ka jingkiew ha ka jingshit, u thah ha ka thaiñ Antarctic bad Arctic u la sdang ban um kloi ïa kaba u la sakhi hi dalade.
haba ban jur ba ka pyrthei ka dang ïaid lyngba kata kaba ki ong, ‘Biosphere Crisis’ bad ka ‘Climate Crisis’, u la ong ba ka por ka la dei ban ïasnohkti bad ïatreilang na bynta ka pyrthei kaba manbha.
U Sahoo u la ïoh pdiang ïa ka khusnam na ka India Green Awards for Environment & Sustainability Excellence ha ka jingïalang ba i-shongkun kaba la long ha Udaipur, Rajasthan ïa kaba la plie da u Myntri Sorkar Pdeng barim, u Suresh Prabhu nalor ka jingïadonlang kiwei-kiwei ki kynrem ki lyndan.
Ki kompeni heh jong ka ri kum ka TATA, JSW, Larsen & Turbo, Kanpur Metro Project, Bangalore Metro Rail, Ahmedabad Metro Rail ki la ïoh pdiang ïa kiwei-kiwei ki khusnam ba ïadei bad ka mei mariang.
Ïa ki khusnam la aiti ban rakhe ïa ki khana ai mynsiem kiba wanrah jingkylla, da kaba ai nam ai burom ïa ki ‘riew shimet bad ki kynhun seng kiba la pyni ïa ka jingminot na bynta ka bha ka miat jong ka pyrthei, ong u Asish Nandan Srivastav, uwei na ki nongpynïaid ba kongsan jong ka jingïalang.
