Shillong, Ïaïong 20
Ka State-BJP ha ka Lah Sngi Blei ka la ong ba kam shym la tyrwa tiket sha u Chief Secretary barim ka Jylla, Bah D.P. Wahlang na ka bynta ka ilekshon shiteng samoi jong ka Shillong Lok Sabha, da kaba pynpaw ba ka jingkren jong u nongïalam ba rangbah ka seng bad nongmihkhmat ka Pynthorumkhrah, Bah A.L. Hek halor kane ka bynta, ka dei ka “jingkren shimet” jong u bad ym ka rai jong ka seng.
“(Ngi) kwah ban kren shai ba ka jingkren u Bah A.L. Hek kaba tyrwa tiket ïa u Bah D.P. Wah-lang, Chief Secretary barim ka dei tang ka jingkren shimet jong u bad kam dei ka rai jong ka seng,” la ong ka BJP ha ka kyrwoh.
“Ym shym la don kano-kano ka jingïakren kaba kum katei ka jingtyrwa hapdeng ki nongïalam ba rangbah jong ka BJP ha Meghalaya”, la ong ka kyrwoh. Haba batai shaphang ka rukom jied kyrtong jong ka seng, ka kyrwoh ka la ong, “Ka BJP ka dei ka seng kaba pynshong nongrim ha ki kyndon bad ka rukom treikam. Ka jingai tiket jong ka seng na ka bynta kano-kano ka ilekshon ka dei ban bud ryntih ïa katto-katne ki rukom treikam ba la buh da ka ‘Central Steering Group’ jong ka seng.”
“Dei tang ka ‘Central Parliamentary Board’ kaba don ïa ka bor ban jied ïa ki kyrtong na ka bynta ka ilekshon MP ne MLA; kata ruh tang hadien ba la dep pynbna ïa ki tarik”, la ong ka kyrwoh.
Halor ka rukom treikam, ka seng ka la ong, “Ha kano-kano ka por ba pynbna ïa ka ilekshon, la ka long sha ka Ïingdorbar Thawaiñ ka Jylla ne Ïingdorbar Parliament, ka seng ka khot ïa ki aplikeshon na ki dkhot jong ka seng kiba kwah ban ïakhun bad ïa ki kyrteng jong baroh kiba kwah ban ïakhun la phah da ka ‘State Election Committee’ sha ka ‘Central Parliamentary Board’. Ka ‘Board’ hadien kane kan sa jied ïa u kyrtong uba biang tam na ka thup kyrteng kiba aplai.”
“Kano-kano ka jingïakren ban ai tiket ïano-ïano khlem da bud ïa ki kyndon kam ju don ha ka seng kum ka BJP,” ka la bynrap.
