Shillong, Ïaïong 20
Ka BJP ka don ka jingkyrmen skhem ban ïoh shuh ïa ki MLA kynthei na ka Jylla ha ki snem ban dang wan.
Haba kren halor ka jingduna ha ka jingdon ki kynthei kum ki nongmihkhmat, u National Secretary bad ‘In-charge’ ka Meghalaya jong ka BJP, u Anil Antony u la ong, “Kumba long mynta ha Meghalaya, ka BJP ka don tang 2 ngut ki MLA hynrei nga tikna ba bun ki kynthei ki la ïakhun hynrei kim shym la shah jied. Nga don mynta ka sngi bad 4-5 ngut ki nongïalam kynthei ba rangbah ha Meghalaya bad bun na ki, ki la ïakhun.”
“Ngi tikna ba ha ki snem ban wan, ngin sa ïohi shuh ïa ki MLA ka BJP kumjuh ïa bun ngut ki MLA kynthei,” u la bynrap.
U Antony u la pynskhem ba ka saiñdur hapoh ka seng ka pyni ïa ka jingkut jingmut jong ka haba phai sha ka jingïashim bynta jong ki kynthei.
“Nga lah ruh ban pyntikna ïa phi ba dei tang ka BJP, ka seng ha ka ri kaba pyntikna ba kan don ka jingïaryngkat ha ka jingmihkhmat jong ki kynthei wat hapdeng ki nongkitkam kumjuh,” u la ong.
“Ka jingjied ïa ki nongmihkhmat jong ngi ka shong ha kti jong ki paidbah. Ngin ïai bteng ban trei bad pyntikna ba katba nang ïaid ka por, ngin sa don bun ngut ki nongmihkhmat kynthei ha ki Ïingdorbar,” la ong u Antony.
U la bynrap ba ka seng ka bthah ïa ka jingmihkhmat jong ki kynthei ha baroh ki kyrdan.
“Ha kaba ïadei bad ki nongkitkam jong ngi ha ka kyrdan jong ka ri, Jylla, distrik bad ha ki kyrdan jong ka ‘Booth’, ngi ju pyntikna ba kan don ka jingmihkhmat kaba biang jong ki kynthei – kaba kham bun ban ïa kiwei pat ki seng ha ka ri,” u la ong.
Halor ka jingjied kyrtong na ka bynta ka ilekshon, u Antony u la ong ba hap ban pyrkhat ïa shibun kiei-kiei.
“Mano ban long u kyrtong ha kano-kano ka ilekshon kam dei kaei-kaei kaba la pynshong nongrim tang ha kawei ka bynta – ka shong ha kiba bun ki bynta. Kin don bun ngut ki kyrtong ki ban aplai bad pyni ïa ka jingkwah jong ki bad haba khatduh, ki nongïalam ka Jylla bad ka Sorkar Pdeng ryngkat lang kin sa shim ïa ki rai kiba biang tam mano ban long u kyrtong,” u la pynpaw.
“Ka don ka ‘Central Election Committee’ jong ka seng kaba kynthup ïa u Myntri Rangbahduh, Myntri kam pohïing bad kiwei-kiwei ki nongïalam ba rangbah kynthup ïa ki President barim bad kiwei,” bynrap biang u Antony.
