Tura/Shillong, K’Lyngkot 14 (UNI)
Ka President ka ri, ka Droupadi Murmu kan sa wan poi ha Meghalaya ha ka Lah Sngi U Blei na bynta ka jingwan jngoh ba ar sngi ïa ka Jylla.
Ka Murmu kan sa plie ïa ka ‘Meghalaya Games’ ha Tura, buh maw nongrim ïa ka ‘Shillong Ropeway’ bad ai jingkren ha ka jingïalang ka ban sa long ha Law Kyntang, Mawphlang ha kane ka jingwan jngoh jong ka, ong ki ophisar.
Kane kan dei ka sien banyngkong ïa ka Murmu ban wan jngoh ïa ka Jylla hadien ba ka la shimti kum ka President ha u snem 2022.
Ka President kan sa wan poi ha Tura, West Garo Hills lashai ka sngi na kad liengsuiñ Lokpriya Gopinath Bordoloi International Airport, Assam da ka ‘Helicopter’ ba kyrpang ka tnad shipai liengsuiñ – MI-17.
Ki ophisar ki la ïathuh ba ka Murmu kan sah shi miet ha Tura.
Ha kajuh ka por, kan dei ruh ka Kongsan ka banyngkong eh sha ka Jylla ka ban sah ha ka ïing ba dang shu plie thymmai jong u Lat ka Jylla kaba ha Tura.
Ka Murmu kan dei ruh ka President kaba 3 ka ban leit jngoh ïa ka Ri-lum Garo hadien jong u President barim, (L) Dr. Rajendra Prasad bad ka Pratibha Patil kiba la wan jngoh ïa katei ka thaiñ ha u 1952 bad 2008.
Ka President kan plie ruh ïa ka ‘Meghalaya Games’ 2024 ha P.A. Sangma Sports Complex, Tura.
Ha kane ka lympung ïalehkai kin don palat 3000 ngut ki nongïalehkai ki ban mihkhmat na ki 12 tylli ki distrik jong ka Jylla kin ïashim bynta ha 22 tylli ki jait jingïalehkai.
Yn kynthup ruh ïa ki jingïalehkai tynrai jong ki Khasi, Jaiñtia bad Garo ha kane ka lympung ïa kaba ka Sorkar ka la mang palat T.23 klur.
Nalor ka jingplie ïa ka ‘Meghalaya Games’, ka President kan wan ruh sha Shillong ban buh ïa u mawnongrim na bynta ka projek ‘Shillong Ropeway’ bad kan ai jingkren ruh ha ka jingïalang ka ban long ha Law Kyntang, Mawphlang ha ka Sngi Ba-ar.
U Director General of Police (DGP) ka Jylla, Dr. L.R. Bishnoi u la lum ïa ka jingïalang jong ki heh ophisar ban khmih bniah ïa ki jingpynkhreh bor pahara na bynta ka jingwan jong ka President.
“Ngi bud ryntih ïa ki kyndon haba ïadei bad ki jingdonkam bor pahara na bynta ka jingwan jngoh ka Murmu katkum ka ‘Blue Book’,” ong u Dr. Bishnoi ïa ka UNI.
Ha kawei ka liang, ka Shillong bad Tura ki la sdang ïa ki jingpynkhreh jingpynkhrum ha ryngkat ka jingpynkhuid ïa ki lynti ki syngkeiñ na bynta ka jingwan jong ka President.
