Shillong, K’Lyngkot 14
Ka Sorkar Jylla ka la siew pisa sha ka National Medical Commission (NMC) na ka bynta ban pynïaid shaphrang ïa ki jingpynbit jingpynbiang ban ïoh sdang noh ïa ka jingpule doktor ha Shillong katba dang ap ban pyndep ïa ka jingtei ïa ki jaka pule doktor.
La ong ba ka Sorkar Jylla ka la dep siew pisa T.1 lak sha ka NMC tang na ka bynta ka jaka pule doktor ha Shillong.
La ïathuh ba ka Myntri ka koit ka khiah ka Kong Ampareen Lyngdoh kan sa lum jingïalang ban ïakren ïa kane ka kam kaba donkam khnang ba ka Jylla kan ïoh ban pynmih kham bun ki doktor ki ban ai jingshakri ha ki jaka sumar ha kane ka Jylla.
Ka Kynhun Myntri ka la dep ai jingmynjur ha u snem ba la dep ban sdang ïa ka jingpule doktor ha Jylla da kaba pyndonkam ïa ki jaka sumar kiba la don lypa kum ha Shillong Civil Hospital, Ganesh Das Hospital nalor ka jaka pule doktor jong ka USTM ha Ri Bhoi District.
Hynrei la ong ba kumba ka long mynta, kaba kham biang ban sdang ïa ka jingpule doktor ka dei ha Shillong da kaba sdang kumba 50 ngut ynda la ïoh jingbit na ka NMC.
La ong ba ki nonghikai kiba la don lypa naduh ki Specialist Doctor bad kiwei kiba lah ban long ki nonghikai khamtam ha kine ki jaka sumar kiba la don lypa kum ka jingsdang noh ïa ka jingpule doktor ha Shillong.
Ka tnat ka koit ka khiah kan sa shim rai ruh haba ïadei bad ka jingtreikam ïa ka Tura Medical College lyngba ka PPP kaba don ka jingïateh bad ki jaka pule doktor ki bym dei na kane ka Jylla.
Ka Jylla Meghalaya ka donkam ban don noh la kajong ka jaka pule doktor namar kumba ka long mynta, ka jaka pule doktor ka dei tang ha NEIGRIHMS kaba dei ka jaka pule bad jaka sumar ba peit da ka Sorkar Pdeng ha kaba yn lah ban pynrung tang khyndiat ngut eh ki samla na kane ka Jylla ban pule ha NEIGRIHMS.
