New Delhi, K’Lyngkot 14
Ka thma hapdeng ka Israel bad ka Hamas ha Gaza ka la kot sha ka 100 sngi ha ka Sngi U Blei. Na ka liang u Myntri Rangbah-duh ka Israel, u Benjamin Netanyahu, u la pynbna ba kane ka thma kan bteng tad haduh ban da ïoh ïa ka jingjop.
Ka thma ka la sdang ha ka 7 tarik Risaw, 2023 hadien ba ki lehnoh Hamas ki la leit ban thombor ha ki bynta ba shathie jong ka Israel. Naduh kato ka sngi bad haduh mynta, 1,139 ngut ki nong Israel ki la ïap katba 240 ngut ki la shah rahbor. Ha Gaza, kumba 23,968 ngut, kiba bun ki dei ki kynthei bad khynnah, ki la ïap haduh mynta.
U Netanyahu u la kular ban “bteng ïa ka thma haduh ban da jop”, haba kren sha ki nongshong shnong jong ka Ri ha ka miet jong ka Sngi Saitjaiñ.
“Yn ym don ki ban khanglad ïa ngi – ym ka The Hague, ym ka Axis of Evil bad ym mano-mano,” la ong u Netanyahu haba thew sha ka mukotduma ba la ai da ka South Africa ha ka International Court of Justice khnang ban pyntreikam da ki sienjam ban pynsangeh ïa ka jingleit hiar thma ka Israel. U la thew ruh ïa ka jingïatreilang jong ki kynhun pyrshah ïa ka Israel kiba don ha ka Ri Lebanon, Syria, Iraq bad Yemen bad kiba la ïoh jingkyrshan na ka Iran.
Kiba bun ki la kynthoh ba kane ka thma kaba dang bteng ka dei kaba la shyrkhei tam hapdeng ka Israel bad ki nong Palestine.
Ha ka taïew banyngkong jong u Kyllalyngkot, ka tnat ba dei peit ïa ki kam pathai khubor ha Gaza ka la pynbna ba ka Israel ka la dep ban kawang palat 65,000 ton u bom ha Gaza. Haba la peit na ki jingtip ba la lum lyngba ki ‘Satellite’, la shem ba 33 na ki 100 ki ïing ki sem ha Gaza ki la shah pynjulor.
Na ka liang ka United Nations ka la antad ba 1.9 million ngut ki briew ki la hap ban phet noh na la ki jong ki ïing ki sem kiba don ha Gaza katba palat 90 na ka 100 ki don hapdeng ka jingma jong ka jingkyrduh bam.
“Ki jingjulor kiba bun, jinghap ban phet shnong, jingthngan bad kiwei ki jingduh ha kine ki 100 sngi ki long ki dak ïong ha ka imlang-sahlang,” la ong ka UN Relief and Works Agency for Palestine Refugees (UNRWA) ha ka Sngi U Blei.
“Ka jingpynpoi ïa ki lad jingïarap ha kane ka thma ka long kawei na kiba eh tam ha ka pyrthei,” la bynrap ka UNRWA.
Na ka liang ka tnat bar ri jong ka Palestine ka long ba ha ki 100 sngi, “ka Israel ka la pynkylla ïa ka Gaza kum ka jaka ka bym long shuh ban shong ban sah bad ka la leh ïa ki kam bymman ki bashyrkhei.”
Ki bor ka sorkar Israel ki la buh ïa ka thong ban pynduh pyndam ïa ka kynhun Hamas bad ïa ka bor ban synshar ïa ka Gaza, bad ban ïoh biang ïa baroh ki briew kiba la shah rahbor ha kaba la ngeit ba ki don sa kumba 136 ngut ha Gaza.
