Shillong, K’lyngkot 14
Ka Haphilakmen Lyngdoh na Shella kaba hap ha East Khasi Hills District ka la ïoh rah ïa ka nam lahduh ryngkat ka song pisa kaba shi lak tyngka ha ka 4th Khasi Dancing & Singing Competition 2023 ba la pynïaid da ka phlim ‘Dhaka Escape’ ka ban sa pyni noh shen ha Bijou Cinema, Shillong kaba la pynkut ha ka 13 tarik mynta u bnai ha Khasi National Dorbar Hall, Mawkhar Shillong.
Ïa ka khusnam sha ka lahduh la sam da u Bah Alvin Sawkmie uba dei MDC ka Mawsynram konstitwensi. Ïa ka nam ba ar la rah da ka Blisdora Khynriam na Mynkrem-Nongjngi kaba hap ha West Jaiñtia Hills District kaba la rah ïa ka song pisa kaba laiphew hajar tyngka, ïa ka nam balai la rah da u Daskhemjingmut Mawblei na Thangmawm Eastern West Khasi hills District, ïa ka nam ba saw la rah da u Shanbor Wahlang na Tynring, East Khasi Hills District bad ïa ka nam basan la rah da ka X-Squad Group na Nongstoiñ, West Khasi Hills District.
Kiba poi final ha kane ka jingïakob kiba kynthup ïa ki nongrwai bad nongshad ki long 104 ngut ba la wan ïashimbynta na baroh hynñiew tylli ki district. Ki nongbishar ha kane ka jingïakob rwai bad shad ki long u Ram Suchiang, Arman Disiar, Sherilin Khongwar, Celina Langstang bad ïa ka jingïalang la pynïaid da u Phira Dohtdong bad Wanbet Shangpliang.
Ban pynsngewtynnad ïa kiba poi sha ka phainal, la ïoh ban shad da ka jingrwai Shillong sha Dhaka na ki tyngshop ki puron ka phlim ‘Dhaka Escape’, kita u Phira Dohtdong, Amazing Kurbah, Nadia Syiemlieh, Joinpil Pde bad la rwai da u Arman Disiar bad Ebiangmitre Lyngdoh.
Ha kane ka sngi la wan synranlang da ki bahaïing jong ki nongïashimbynta, ki tyngshop bad ki puron phlim Khasi.
Haba ai jingkren kum u kongsan, u Bah Alvin Sawkmie u la pynpaw ka jingsngewkmen ban ïohi ïa ki hep barit bad ki samla kiba don shibun ki sap ki phong kiba la wan ban ïashimbynta khnang ba kin long kiba shlur.
U la ong ha kane ka juk kaba mynta kiba don sap ban shad bad rwai ki la ïoh ban kamai jakpoh namar ka la don ka rynsan ‘social media’ kaba la ïarap ban poi kloi ha man u briew.
“Nga ju ïohi ba ngi ju kyrshan ïa ki phutbol team na Bilat ne ki nongshad nongrwai bad ki phlim na kiwei ki ri hynrei ngim ju kyrshan ïa ki jong lajong, namarkata nga kyntu ba ngin sdang ban kyrshan shwa ïa ki samla na jylla lajong ba ngin ïa kiew lang” u la ong.
Na ka liang ka Chwa Syiemlieh Film Production kan sa pynlong biang ïa ka 5th Khasi Dancing & Singing Competition 2024-25 na ka bynta ban pan jingkyrshan na ki paidbah ïa ka phlim ‘Student Bangalore’ kaba dang ïaid mynta ban ringdur.
