Shillong, K’lyngkot 14
U Bah Amazing Kurbah u la kyntu ïa ki hep barit bad ki samla ba kim dei ban duh mynsiem haba don ki briew kiba kren beiñ haba phi sdang ban shad ne sdang ban rwai hynrei phi dei ban minot thop ban pyntbit haba phi don ïa ka sap.
Ïa kine ki kyntien u Bah Amazing Kurbah u la pynpaw haba ai jingkren ha ka jingïalang shwa ban sam khusnam ha ka final 4th Khasi Dancing & Singing Competition ba la pynïaid da ka phlim ‘Dhaka Escape’ kaba la pynkut ha ka 13 tarik mynta u bnai ha Khasi National Dorbar Hall Mawkhar.
U Bah Amazing u la pynkynmaw ba mynshwa u la lap ïalade haba u sdang ban leit shad ïakob ha ki rynsan namar ki bun kiba pynduh mynsiem hynrei um ju pynsngap. Pynban namar ba ka karta ka la ïaid um ju shad shuh hynrei haba u ïoh ban shad biang ha ka music video jong ka phlim ‘Dhaka Escape’ ka met ka la sdang ban eh bha.
U la ai khublei ïa ka phlim ‘Dhaka Escape’ kaba la khot ïa u ban sdang biang ban kynmaw ïa ki por ba u dang khie samla namar ba u la ïoh ban pyni bïang ïa ka sap shad lajong ynda u la rangbah.
U Bah Amazing u la ong ba lada ki rem ha ka jingïakob kiba krenbeiñ kin ïoh bor bha hynrei u la kyntu ba kim dei ban sngap namar da ka jingrem kin dang leh bha.
Shuh shuh u la ong lada phi don ka sap katno katno lada phim trei shitom kan nym poi sha kliar jong ka nam.
Kum ka jinglehkmen haba ka music video ‘Shillong sha Dhaka’ ka dap shi million ki nongpeit ha youtube hapoh shi bnai, u Bah Amazing Kurbah ryngkat bad u Phira Dohtdong, Nadia Syiemlieh, Joinpil Pde, Bah Wanbet Shangpliang ki la ai jingshad bad la rwai da u Arman Disiar bad Ebiangmitre Lyngdoh shwa ban sam ïa ki khusnam sha ki nongjop.
Ha kane ka jingïakob, ka Haphilakmen Lyngdoh na Shella, East Khasi Hills District ka la ïoh rah ïa ka nam lahduh ryngkat ka song pisa kaba shi lak tyngka.
