Tura, K’Lyngkot 15
Ha ka jingplie pyrda ïa ka 5th Meghalaya Games 2024 ha ka Lah Sngi U Blei da ka President jong ka Ri ha PA Sangma Stadium Tura, ki khynnah ïalehkai kiba la mihkhmat na ki District bapher bapher jong ka jylla ki la hap ban mad ïa ka jingshah thngan baroh shi sngi hadien ba ki khlem ïoh jingbam naduh mynstep bad ki hap ban ap sah baroh shi sngi ban ïoh ïa ka jingbam.
Katkum kawei ka dur kaba la saphriang halor ka rukom ai jingbam ïa ki khynnah kiba ïalehkai ha ka Meghalaya Games 2024 la sakhi ba ki nongpynïaid ki la ai da ki jingbam dap lyer.
Na ka liang ki katto katne ki khynnah ki la ong ba ha kane ka sngi plie pyrda ïa ka Meghalaya Games, kim shym la ïoh bam eiei baroh shi sngi, hynrei ki la shu ïoh tang ki jingbam kiba pyndap lyer kiba kynthup ïa ki ‘chips’, umsoh, ‘samosa’ bad ki shana. Hynrei ki dang ïoh ïa ka bam ja sngi haduh ka por 7 baje janmiet bad ka ban dei artad ka ja miet ïa ki.
Kane ka jingbym ïoh ïa ka bam ka la jia ruh naduh ka Sngi U Blei ha kaba ki nongïalehkai lem bad ki dkhot nongkitkam ha la ki jong ki jait jingïalehkai jong ka 5th Meghalaya Games ki la pynpaw ïa ka jingsngew bynñiaw halor ka jingbym lah ban pynbiang ïa ka bam ka dih ha ka por kaba biang.
“Ngi sngewsih halor ka jingbym lah ban pynbiang jong ki bor ba dei khmih ïa ka bam ha ka por kaba biang. Ngi hap ban bam ja step haduh 4-5 baje janmiet,” la ong ki nongïalehkai bad ki dkhot nongkitkam.
Haba pyrshang ban wad jingtip halor kane na ki bor ba dei khmih, u Assistant Director ka tnat ïalehkai, u Bah Païa War Nongbri, u la pynpaw ba u la ïoh jingtip halor kane ka jingjia bad la phah ïa ki heh jong ka tnat ba kin leit jurip halor ka jingbym lah ban pynbiang ïa ka bam.
“Ngi la phah ïa ki ophisar ba kin leit jurip khnang ban tip ïa ka daw jong ka jingslem ban pynpoi ïa ka bam sha ki khynnah bad kumjuh sha ki dkhot jong ki komiti bapher bapher,” la ong u Bah Païa.
Na ka liang jong ki kmie ki kpa jong ki khynnah ïalehkai ruh ki la pynpaw ïa ka jingsngew diaw bad bitar halor kane ka jingleh bad ka jingbym lah ban pynbiang ïa ka bam ka dih kaba biang ïa ki nongïalehkai.
Lah ban kdew ba ka jingmang tyngka ban pynlut ha kane ka lympung Meghalaya Games ka long T. 23 klur.
