Shillong, K’lyngkot 15
Ka jingïakynduh jong ka Sorkar ban ïakren halor ka jingweng noh ka Hynñiewtrep National Liberation Council (HNLC) na ka jingïakren ïasuk ka lah ban long hadien ka jingwan ka President sha kane ka Jylla.
Ha ka taïew ba la dep, u Myntri Rangbah Conrad K Sangma u don sha Rilum Garo ban pynkhreh ïa ka jingwan ka President ban plie ïa ka Meghalaya Games ha Tura. Katba u Symbud Myntri Rangbah Bah Prestone Tynsong uba dei peit ïa ka tnat korbar Jylla u khlem pat don ha Shillong.
Ka tyllong khubor ka ïathuh ba ka jingïakynduh kaba kham halor kan dei hapdeng u Myntri Rangbah bad u Symbud Myntri Rangbah nalor ki heh pulit ka Jylla bad ki ophisar kiba peit ïa ki tnat bapher bapher.
La ong ba ha kane ka jingïakynduh ka phang kaba kongsan ban ïakren ka dei halor ka jingweng ka HNLC na ka jingïakren ïasuk halor ka jingkynnoh ba ka Sorkar kam kloi ban map noh ïa ki kam bymman kiba la leh da ka HNLC ha ki por ba la leit.
Ka Sorkar baroh shikatta ka la ong ba ka kloi ban ïakren ïasuk bad ka HNLC bad ban plie ruh ïa ka lynti ban wan ki nongïalam kiba hakhmat jong ka seng ban pynïaid shakhmat ïa ka jingïakren.
Hynrei na ka liang ka HNLC ka pynpaw ka jingartatien ban wan bad ka kwah ban map noh baroh ki kam bymman kiba la pynrung ha ki jingujor pyrshah ïa ka seng bad ïa ki nongïalam kiba hakhmat.
Namarkata, bym don kano-kano ka jingkren kaba shai, na ka liang jong ka HNLC ka la pynbna ba ka la weng noh na ka jingïakren ïasuk katba ka Sorkar kam pat lah ban map ïa ki kam bymman.
