Shillong, K’Lyngkot 15
Wat la ki dukan kiba die jingbam harud surok ki la phuh-phieng bha hynrei ka kamai kajih jong ki pat ka la hiar arsut ym kumba ju long ha ki sngi bad ki por ba la leit.
La ïoh ban sakhi ba ki dukan die jingbam kiba don harud surok naduh Civil Hospital Shillong ter ter ka surok shaduh 3 Mer, 7 Mer bad shaduh Mawphlang kiba die ja die sha, ki dukan die ïa ki soh ki pai, ki dukan die kwai bad ki dukan die khutia-mutia, wat la ki la shah pynphuh pynphieng da ki jaiñ rong jngum ba la pyndait bad pynitynnad hakhmat ki dukan ki jong ki, kaba la pynphuh shi katdei ïa kine ki jaka ba don ki nongdie jingdie harud surok.
Wat la ka jingpynphuh jingpynphieng ka la long kaba itynnad, hynrei kaba sngewsih pat ka long ba ha kito ki dukan harud surok ba ju wan thied jingthied da ki nongleit nongwan da ki kali, ki la hap ban mad ïa ki jingeh na ka jingbym lah ban die namar ka jingduna palat jong ki nongwan thied jingthied.
Haba pyrshang ban wad, balei ka leit jia kumne, la ong ba kito kiba ju ïaid lyngba kane ka surok naduh Umshyrpi ter ter shaduh 7 Mer da ki kali, kim ïoh lad satia ban ïeng hakhmat ki dukan ban hiar ban thied jingthied khamtam ki soh ki pai, namar la khang pyrshah ban pynïeng kali harud surok.
La ïoh ban sakhi ba wat haba la pynïeng ïa ki kali shabar jong ka surok ka bym pynwit satia ïa ka leit ka wan jong kiwei hynrei na ka liang ki pulit kiba la ap pahara ha kine ki bynta, kim shym la shah wat tang ban ïeng shi-por ar-por bad ong ba ka dei ka hukum kaba la ai da ki bor kiba nalor.
Ka jingkylli kaba mih hangne ka long hato, balei ba pynmih ka jingpyrkhing kaba haduh katne katne ïa ki paid nongleit nongwan kiba kwah ban thied jingthied ïa la ki jingdonkam.
Kiba bun ki la buh jingkylli ruh ba kan don jingmyntoi aïu ban pynbhabriew ïa kine ki dukan die harud surok lada kim ïoh lad ban ïeng kali bad ban thied jingthied na kine ki dukan.
