Tura, K’Lyngkot 15
Ka President jong ka ri ka Droupadi Murmu ka la plie ïa ka lympung ïalehkai 5th Meghalaya Games 2024 ha ka Lah Sngi U Blei ha P.A Sangma Stadium kaba don ha Tura, West Garo Hills District.
Wat la ha kane janmiet ka suiñ bneng ka long kaba khriat hynrei kane kam shym ka theh umpjah satia ïa ka mynsiem jong 3000 ngut ki nongïalehkai kynthei bad shynrang kiba la wan na kylleng ka district jong ka Jylla ban pyni ïa la ka sap ïalehkai kaba kyrpang.
Haba ai jingkren ha kane ka sngi plie, ka President kum ka kongsan ka la pynpaw ïa ka jingkmen ban ïoh ïa kane ka kabu ksiar ban plie ïa kane ka lympung bad kaba la ai nam ha ka kyrteng jong u PA Sangma, uba la long u Myntri Rangbah bad kumjuh kum u Lamphang barim jong ka Lok Sabha bad kum u Lamphang ba nyngkong eh na ka thaiñ Shatei Lam Mihngi.
Ka President ka la ban jur ruh ïa ka jingdonkam ban kyrshan bad ban ai mynsiem ïa ki samla ‘riewlum ba don sap khnang ban saiñdur ïa ka kam ïalehkai. Namarkata, ka khmih lynti ba kane ka Meghalaya Games kan long kaba ai mynsiem ïa ki khun samla ban phrang ïa ka mynsiem ïakhun bad ruh ban wanrah ïa ka jingkiew jong ki kam ïalehkai ha baroh ki liang.
Na ka liang u Myntri Rangbah ka Jylla, Conrad K Sangma, u la ai khublei ïa ka President kaba la lah ban ïadon lang ha kane ka janmiet ban plie ïa kane ka lympung kaba long ruh ka sien kaba nyngkong ba kat ka nongïalam ba hakhlieh duh jong ka ri ban wan ïuhkjat ha Tura na ka bynta ban plie ïa kane ka lympung ba heh ha ka Jylla.
Nalor nangta, u Myntri Rangbah u la ong ka jingpynlong ïa kum kane ka lympung ym dei ba la shu pynlong, hynrei ka dei kaba ka sorkar ka bet ïa u symbai ha ki pateng ki ban wan da kaba plie lad ba kin sei madan ïa ka sap kaba ki don ha ki kam ïalehkai.
“Ha kine ar samoi ka jinglong Myntri Rangbah ngi la lah ban tei ïa kiba bun ki jaka ïalehkai bad ngi khmih lynti ha kine ki san snem ki ban wan ngin dang ïai bteng ban pynurlong ïa ki jaka ïalehkai bapher bapher ha ka Jylla hi baroh kawei.”
“Nga ai khublei ïa baroh ki dkhot jong ki komiti treikam bapher bapher kiba la duh dem duh thiah tang namar ban trei shitom ban pynlong ïa kane ka lympung kaba jop.”
Kumjuh na ka liang u Myntri ka tnat Sports and Youth Affairs u Bah Shakliar Warjri u la ong, “Nga ïeng hangne hakhmat jong phi kum u Myntri jong ka tnat ïalehkai, da ka mynsiem kaba rhem ban ïohi ïa ka jingsdang jong ka 5th Meghalaya Games, kaba ka jingpynkhreh ïa ka, ka la wan na ki jingïatrei lang jong baroh ki tnat treikam sorkar, ki volunteer bad ki khynnah ïalehkai kaba long kaba thaba kum ka dongmusa jong ka olympik ka ban tehsong ïa baroh ki kynhun jait bynriew jong ka Jylla hi baroh kawei.”
Kham ha shwa na ka liang ka MP ka Tura Parliamentary Constituency ka Agatha K Sangma ka la ai ki kyntien pdiang burom ïa ka President bad kumjuh na u Lat ka Jylla u Phagu Chauhan.
Na ka liang ki kynhun ïalehkai jong ki district bapher bapher ka Jylla ki la pynithuh ïalade da kaba ïaid (march-in) bad la ïoh ruh ki jingshad tynrai kum ka shad wangala, shad mastieh, shad pliang na ki paid Garo, Khasi bad Jaiñtia.
