Tura, K’Lyngkot:
Haba ïadei bad ka jingwan jngoh jong ka President ka India, ka Droupadi Murmu ïa ka Tura na bynta ka ‘Meghalaya Games’ ka ban sdang naduh ka 15 tarik mynta u bnai, ka tnad pulit ka West Garo Hills (WGH) ka la pynmih ïa ka jingpynbna na bynta ki kali ha ryngkat ka jingkyrpad ïa ki paidbah kiba leit sha Shillong ne Guwahati ban kiar na kaba pyndonkam ïa ka surokbah NH – 51, ka lynti ka ban pyndonkam da ki VVIP.
“Kane ka dei ka jingpyntip sha ki paidbah ba ka President ka India, ka Droupadi Murmu kan sa wan jngoh ïa ka Tura ha ka 15 tarik u Kyllalyngkot. Haba ïadei bad ka ïaid ka ïeng jong ki VVIP, kan don katto-katne ka jingthut ha ka jingïaid ki kali ha ki jaka bapher-bapher jong ka sor Tura bad ha ka lynti ka ban pyndonkam da ki VVIP. Kumta la kyrpad ïa ki paidbah ban kiar na kaba leit sha ka thaiñ Tura bad ki jaka ba marjan sa tang lada donkam eh,” ong ka kyrwoh na u SP, u Abraham T. Sangma.
U la bynrap ba yn pynsangeh ïa ka ïaid ka ïeng jong ki kali na bynta 1 kynta ha ka por mynsngi hashuwa ban wan poi ki VVIP ha ka 15 tarik u Kyllalyngkot ha baroh ki lad. Kumjuh, yn ym shah ïaid ïa ki kali HMV bad trok sha Tura na bynta 24 kynta hashuwa ban wan poi bad haduh ban da mih noh ki VVIP.
Ka kyrwoh ka ong ruh ba kito kiba kwah leit sha Guwahati bad Shillong ha ka 15 bad 16 tarik na South West Garo Hills District, Mankachar, Assam la kyrpad ïa ki ban kiar na kaba pyndonkam ïa ka lynti Tura, hynrei ban ïaid lyngba ka surok AMPT.
Kumjuh, kito kiba leit sha Guwahati bad Shillong ha kajuh ka ngi na Baghmara, South Garo Hills District, la kyrpad ba kin ïaid lyngba ka lynti Siju, Rongjeng.
Shuh shuh la kyrpad ïa ki nongñiah ban kiar na kaba pynïeng kali harud surok ha ka lynti ka ban pyndonkam da ka President ha ka step 15 tarik haduh ka por mynsngi.
Ha kawei ka liang, la pyllait ïa ki tnad treikam ba kyrkieh ne ‘Emergency Service’.
Ka kyrwoh ka ong ruh ba la buh ïa ka kynhun ki ophisar bad pulit pynïaid kali ban pyntikna ïa ka jingïaid beit ïaid ryntih jong kitei ki jingpynbit pynbiang. Na bynta kino-kino ki jingkylli ne jingtip haba ïadei bad ka rukom ïaid ki kali, lah ban kynjoh sha ka Police Control Room (PCR) ha ki nombor 8837423053 bad 9O89199054.
