Shillong, K’Lyngkot 15
Ka jingsaphriang kynsan jong kawei ka dur khih lane ka ‘video’ ha ki lad rynsan ‘social media’ ha kaba la ïohi ba kawei ka thuk-thuk (Bike) ka la leh ‘stunt’ lane ñiah khyllew sap ha ka surokbah ha Umsawli New Shillong ka la leit ban tynrah kynsan ïa kawei pat ka scooty kaba wan na ki thaiñ sharum haduh ba utei u nongñiah ka scooty u la her shajrong.
Ha katei ka dur khih la ïohi ba utei u nongñiah thuk-thuk uba la leh ‘stunt’ ha katei ka surok, u la pynher sted ïa ka thuk-thuk bad kaba la pynlong ruh ban ym lah shuh ban tehlakam ïa ka bad u la syntuid ha surok bad ka thuk-thuk jong u ka la leit ban tynrah ïa ka Scooty jong uwei pat u khynnah uba wan na ki thaiñ sharum haduh ba une u nongñiah scooty u la her shajrong bad ym lah shuh ban khie.
Shuh shuh katkum ha katei ka dur khih, la ïohi ba utei u nongñiah thuk-thuk hadien ba u la ur, u la khie pynsted bad u khlem shym la mynsaw satia katba u nongñiah ïa ka Scooty pat u la thiah sah ha surok khlem lah shuh ban khie bad ki khynnah kiba don ha katei ka jaka ki la leit ban ïarap ïa u.
Katkum ki tyllong khubor la ïathuh ba ïa utei u briew la pynkit noh sha ka jaka sumar ha NEIGRIHMS Hospital khnang ban ïoh ïa ka jingsumar.
Wat la ym tip satia ïa ka por bad ka tarik kaba tikna jong katei ka jingjia hynrei katei ka dur khih ka la saphriang kynsan ha ka 15 tarik u Kyllalyngkot 2024. Kane ka la wanrah ka jingbitar bad ka jingdom na ki paidbah kiba peit ïa katei ka dur khih namar ba kum kine ki jingïaleh ‘stunt’ ha ki surokbah ki lah ban ïalam sha ka jingma jingmynsaw bad shaduh u pud ka jingïap. Namar kata, na ka liang ki paidbah ki la pynpaw ba kum ki pulit ki dei ban leh eiei halor kine ki jingïaleh ‘stunt’ ha ki surok paidbah.
Na ka liang u Superintendent of Police (City), Bah Vivek Syiem u la ong ba na ka liang ka tnad pulit kan sa leh ïa kaba donkam bad lada lap ïa kino-kino ki khynnah kiba ju mlien ban ïalehkai ïa ki ‘stunt’ ha ki surok paidbah, yn sa leh da kaba tyngeh ïa ki.
