Shillong, K’Lyngkot 15
Ka Seng Ri-Bhoi Youth Welfare Organisation (RBYWO) ka la pan jingshai na ka Sorkar halor ka jingmih jong ka kompani M/s Double Seven Corporation, kaba kynnoh lum khajna be-aiñ da ki phew hajar tyngka na ki kali kit syiar ha surok 4-lane ka Them Ri-Bhoi.
Ka RBYWO ka la phah da ka shithi sha u Myntri ba dei peit ïa ka tnat Ri Jingri ka jylla u Bah Alexander Laloo Hek ban pynshai kaei kata ka M/s Double Seven Corporation kaba lum pisa na ki kali kit syiar ha Byrnihat.
Ha ka shithi kaba la phah sha u Myntri ïa kaba la soi da u Bah Elvis Kyrsian, Vice President ka seng bad u Bah Kenny Nongrum, ki la kynnoh ba ka M/s Double Seven Corporation ka la shim na ki kali kit syiar hapdeng T.30,000 bad T.90,000.
Ka seng haba tohkit, ka la shem ba kine ki kali kit syiar ki hap ban siew ïa ka bai rung ki kali da kaba pynthep ïa ka pisa ha ka google pay ne Gpay ha ka Account ka M/s Double Seven Corporation AC: 59208413927554 bad lyngba u IFSC: HDFC0001643, uba dei u IFSC code na Itanagar.
U President ka RBYWO Bah Ban Kharnaïor, u ïathuh ba ka Seng ka la leit ban ujor ïa ka jingdon jong kane ka kompeni sha u Myntri, hynrei na ka liang u Myntri u la pynpaw ba um don jingtip eiei ïa kane ka kam.
U ïathuh ba hadien kane ka jingujor, ki briew ba pynïaid ïa kane ka M/s Double Seven Corporation, la kynnoh ki la phah siew mynta ïa ka khajna da ka pisa ne lyngba ka gpay sha u President ki Meghalaya Poultry Association Bah Wanshai Kharshandi bad sha u Vice President Bah Shanlang Mukhim.
Namar kata, ka RBYWO ka la phah mynta da ka dorkhas sha u Myntri ba pan jingshai halor ka jingmih jong kane ka kompeni bad ka jingphah siew khajna sha ki nongïalam ka synjuk ki nongdie doh syiar nalor ka jingtip kaba bniah ba shano kane ka pisa ba lum khajna ka poi namar ka Bank Account ba phah siew ka dei kaba na Itanagar, Arunachal Pradesh.
“Lada ka jylla ka ïoh khajna hok sha ka pla ka Sorkar ngim da sngew pyrshah eh, hynrei ba kan leit sha ka pla jongno-jongno ngim lah ban pdiang bad lada ka jingkhrong khajna sorkar ka long ha kane ka rukom ka pyni ba ka don ka High Level team kaba bamsap bad pynïaid shibun ïa ki kam beaiñ hapoh ka Jylla jong ngi,” u la ong.
U la pyntip ba ka seng kan ap ïa ka jingpynshai na ka Sorkar la ka long lashai ne lashisngi. Lada kam lah ban ai jingpynshai, yn ujor da ka ejahar sha ki bor ka aiñ.
