Shillong, K’Lyngkot 15
Ka nongsaid aiñ ka Jylla, ka Dr. Fenela Lyngdoh Nonglait ka la ong ba ka soskular jong ka kylla banyngkong ba ïadei bad ka jingïapynbeit pud ba la ïasoi hapdeng ka Meghalaya bad Assam ka long ka bym hun satia khamtam na bynta ki nongshong shnong ha ki jaka khappud.
“Ka don ka jingbym hun jong u paidbah babun balang khamtam jong ki shnong kiba don ha khappud,” ong ka Dr. Nonglait haba kren sha ki lad pathai khubor ha ka Lah Sngi U Blei.
Ka la ong ruh ba haba leit pynsngew ïa katei ka bynta sha ki Myntri ba dei khmih, ki thet-kti pynban bad ong ïa ka “phi dei ka nongsaid aiñ, phi tip kham bha ba shisien ba la dep soi ym lah kynran dien bad haba la dep ïasoi, dei ban pynsted ban pyndep noh ïa kiwei-kiwei ki kylla”.
“Nga ong phi kmen ïa ka jingpyndep khlem ka jinghun jong ki paidbah. Kane kam lah ban long kaba pura ne ka jinghun jong ki paidbah ban ïoh ïa ka hok,” ka la ong.
Katei ka nongsaid aiñ ka la ong ruh, “Kam ju don ka jingïakajia pud ha ka Jylla jong ngi, ka don tang ka jingkyntur pud na kiwei hynrei la shu kynnoh ba don jing-ïakajia, hynrei kane ka wan nawei, nabar. Ka jingïakajia pud ka mut haba phi leit ban knieh ïa ka jaka jong kiwei bad kiwei ruh ki wan knieh.”
Haba pynkynmaw ïa ka jingïakynduh jong ka bad u MP ka Assam uba dei ruh Myntri ka Sorkar Pdeng, u Sarbananda Sonowal uba la tyrwa ïa ka ban pynïasoh sha ka BJP, ka Dr. Nonglait ka la pynsngew ha u ïa ka jingbym hun halor ka jinglong-jingman ka jingïasoi ïa ka soskular ka jingïapynbeit pud (kylla banyngkong) bad na ka liang jong u, u la ong ba lada ym hun, lah ban khmih bniah biang sa shisien ïa katei ka bynta.
“Nangtei ki ong ba dang lah ban khmih bniah biang (soskular ba la ïasoi), hangne ki ong ym lah shuh,” ka la ong.
Ka la ïathuh ba ha ka por ba ki nongshong shnong khappud ki la wan ud sha ka halor katei ka bynta, la pyrkhat ban ujor mukotduma, hynrei hadien ba la ïohsngew ïa katei (ba lah ban khmih bniah biang), ka la ong ba ka don ka lynti jong ka saiñ pyrthei kaba kham suk ban ïa ka ïingbishar.
“Da ka wan da kane ka lynti, da kaba suk nga lah ban tuklar bad pynsngew sha kiba dei khmih namar haba ïasoi hapdeng ka Meghalaya bad Assam, hap pynskhem na Delhi lyngba ka tnad kam pohïing,” ka la ong da kaba bynrap ba ka dang don ka jingkyrmen ïa ka jaidbynriew.
Shuh shuh ka la ong ba lada ka jop ïa ka ilekshon MP ban wan, kan ym leit kyrhuh ne kaw-kaw hapoh ïingdorbar hynrei kan leit kum ka trai ban ïatai markhmat ïa ki mat.
“Phin ïohi man ba long Dorbar Parliament, ngan ym sngap bad ngan kren ïa ka jingshisha bad ka hok ka ju ïeng rasong,” ong ka Dr. Nonglait.
Ha u Lber jong u snem 2022, ka Meghalaya bad Assam ki la soi ïa ka soskular jong ka kylla banyngkong ka jingïapynbeit pud halor ki 6 tylli na ki 12 tylli ki jaka kiba don ha shi lynter khappud hapdeng kine ki 2 Jylla.
