Shillong, K’lyngkot 15
Ka President jong ka ri, ka Droupadi Murmu kan wan poi ha nongbah Shillong ha ka Sngi Ba-ar bad ha kane ka sngi kan leit sha Mawphlang ban ai jingkren ha ka jingïalang paidbah kumjuh ban buh ruh ïa u mawnongrim na kane ka jaka ban tei ïa ka Shillong Ropeway Project ka ban pynïasoh ïa ka jaka jngohkai na Lum Shyllong sha Riat Laban.
Ka President kan wan da ka helicopter na Tura sha Shillong ha ka Sngi Ba-ar. Ha ka por 3 baje janmiet kan don ha Mawphlang na bynta ban ai jingkren sha ki paidbah ha kane ka jaka kaba don mar syndah bad ka ‘law kyntang.
Ka Shillong Ropeway Project, ka dei shibynta na ka projek ban kyntiew ïa ka kam jngohkai bad ka jingmang pisa ka long kumba T.138 klur ha kaba yn tei ïa ka Lower Terminal Point (LTP) ha Riat Laban bad ïa ka Upper Terminal Point yn tei ha Lum Shyllong.
Ha kane ka jingwan ka President, na ka liang ka Sorkar Jylla bad ki bor district ki la pynkhreh ïa ki bor pahara ha kaba yn don kumba khyndai pyrton ki pulit pahara ha kane ka nongbah.
Na ka liang ki bor pahara ki la dep pynlong ïa ka jingpyrshang haba ïadei bad ka rukom ïaid ki kali ha ka Lah Sngi U Blei ynda ka President kan wan poi ha kane ka nongbah.
La ïathuh ba ka President kan sah miet ha Shillong shimiet bad kan leit phai noh sha Delhi ha ka Sngi Balang.
Ka President ka la don ha Tura ha ka Lah Sngi U Blei bad ka la plie ïa ka Meghalaya Games ha kaba la donlang u Lat ka Jylla Phagu Chauhan, u Myntri Rangbah Conrad K Sangma, u Myntri ka tnat Ïalehkai Bah Shakliar Warjri lem bad kiwei kiwei ki Myntri bad ki kynrem ki lyndan.
