Khliehriat, K’Lyngkot:
Ka Seiñ Raij Tuber ha ka kyrwoh khubor ba la phah da u Bah R Harvis Phawa President ryngkat u General Secretary Bah Jolby Sana ki la pyntip ba ha ka 17 tarik Kyllalyngkot kan plie paidbah ïa u mawdur (statue) jong u Woh Tep Kyndait uba dei riewkhraw (Mar) jong ka Raij Tuber bad uba dei ruh u khlawait jong ka Rilum Jaiñtia.
Une mawdur u don hajan u Mot u Woh Tep ha ka shnong Tuber Kmaishnong, East Jaiñtia Hills District.
Katei ka sngi plie ïa u mawdur kan dei ruh ka lyngkhuh sngi ïap ba 355 snem jong u Woh Tep, uba shah pynïap ha u Syiem ka Jaiñtia Pur ha ka 17 tarik Kyllalyngkot 1669.
U Woh Tep Kyndait u dei u briew uba donburom bad don ka mynsiem ieid jaidbynriew. U dei ruh uba satar bad shlur ban ïeng ïaleh ïa ki briew kiba nabar kiba wan ban thombor ïa ka jait ka kynja ki khun ki hajar kumjuh ïa ka thaiñ Pnar hi baroh kawei.
U kongsan ban plie ïa une mawdur un dei u Symbud Myntri Rangbah ka jylla u Bah Sniawbhalang Dhar ha ka jingdonlang u Myntri Sorkar u Bah Kyrmen Shylla, u MLA ka Jowai Bah Wailadmiki Shylla nalor kiwei kiwei ki kynrem lyndan.
Kumta ka Seiñ Raij Tuber ka kyrpad ïa baroh ki President, Secretary jong ki Raij bapher bapher hapoh ka Ri 12-Dolloi 30 Syiem kumjuh ki kynhun trei mon sngewbha ban wan sha kane ka jingïalang kyrpang, la pynkut ka kyrwoh na u President ka Raij Tuber.
