Shillong, K’Lyngkot 16
Ka North Eastern Council (NEC) kan pynlong ïa ka jingïalang kaba shi sngi lane ka Plenary ha ka 19 tarik Kyllalyngkot ha State Convention Centre, Shillong.
Ha kane ka sngi, u Chairman ka NEC bad uba long ruh u Myntri Korbar Ri, u Amit Shah, un wan ban pynïaid ïa ka jingïalang.
Nalor u Amit Shah, u Myntri Sorkar Pdeng ka tnat DoNER, Tourism & Culture, u G. Kishan Reddy, uba long ruh u Vice-Chairman ka NEC, bad u Myntri Khynnah ka tnat DoNER, u B.L. Verma, ryngkat bad ki heh ka tnat DoNER bad NITI Aayog na New Delhi kin wan ban ïashim bynta.
Ha u kyrwoh khubor ha ka Sngi Ba-Ar na ka NEC, la ong ba baroh ki Lat bad Myntri Rangbah jong ki jylla ka thaiñ Shatei Lam Mihngi bad kumjuh ruh ki Chief Secretary bad ki heh sorkar kin wan sha katei ka jingïalang.
Ki tnat sorkar kum ka Assam Rifles, NEEPCO, NHIDCL, NEDFi, NERCORMS, NERAMAC, NEHHDCL, NESAC bad NIC kin don lang.
Ha katei ka sngi, u Amit Shah un pyllait ruh ïa ka NEC Year Book. U Secretary ka NEC, u K Moses Chalai, un ai ïa ka jingkren pdiang sngewbha katba u Secretary ka tnat DoNER, u Chanchal Kumar, un batai halor ki sienjam ba la shim da ka tnat ha kane ka thaiñ.
Ha ka 18 tarik Kyllalyngkot, kan don ka jingïalang hapdeng ki Chief Secretary ki sorkar jylla, Secretary ki tnat Sorkar Pdeng, dkhot ka NITI Aayog, Director General (Assam Rifles) bad kiwei pat ki heh sorkar.
