Shillong, K’Lyngkot 16
Ka Voice of the People Party (VPP) ka la ai por 24 kynta ïa u Myntri Rangbah ka Jylla, u Conrad K. Sangma ban thung biang ïa ki ophisar ba shah weng kam jong ka Lokayukta lym kumta ka seng kam banse ban ïaid shakhmat bad ka jingïakhih paidbah.
“Nga na ka liang ka seng nga pynpaw ka jingsngewsih kthang halor ki sienjam ba la shim dang shen da ka Sorkar jong phi ban tuklar haba ïadei bad ka jingtreikam jong ka ophis ka Lokayukta ha kaba ki ophisar ha katei ka ophis ki la shah weng kam halor ki kyndon kiba long pyrshah ïa ka kontrak ka jingthung kam bad ka nongrim jong ka hok,” la ong u General Secretary ka VPP, Dr. Ricky A.J. Syngkon ha ka kyrwoh ba la phah sha u Myntri Rangbah ka Jylla.
Ka seng ka la pynpaw ruh ka jingsngewsih naba kumba la paw ha ki lad pathai khubor, katei ka jingleh u Myntri Rangbah la leh ha ryngkat ka jingthmu ba sniew, ha kawei ka liang kaba pynduh pat ïa ka jingshaniah kaba ki paidbah ki don ha ka ophis jong ka Lokayukta.
Kumta ka seng ka kyntu ïa u Myntri Rangbah ban thung biang mardor ïa kito ki ophisar ba shah weng kam ha ka kam ba ki don tad haduh ban da kut ka samoi treikam jong ki.
“Lada phim lah ban pynurlong ïa kane hapoh 24 kynta naduh ba ïoh pdiang ïa kane ka shithi, yn pynbor ïa ka VPP ban ïaid shakhmat bad ka jingïakhih paidbah pyrshah ïa katei ka jingleh ka bym ïahap bad kaba long be-aiñ,” la ong u General Secretary.
Katkum ki khubor ba la mih dang shen, la ong ba 3 ngut ki IO ba kynthup ïa u Director of Inquiry & Prosecution, Bah J. Rymmai, lem bad ki Enquiry-cum-Investigating Officer – R. Pde bad Anil K. Sangma, ki la shah weng kam lyngba ka kyrwoh ha ka ‘WhatsApp’. Dei kitei lai ngut kiba la thad madan ïa ka jingkynnoh bamsap kaba la kot da ki klur tyngka ba la kynnoh donkti da uwei u MLA, Sanjay A. Sangma, uba dei ruh u kynum jong u Myntri Rangbah ka Jylla.
Katei ka kam bamsap kaba la kynnoh ka dei halor ka jingshna ïa ka Hostel na bynta ki MDC ka Garo Hills Autonomous District Council (GHADC) ha Tura. Kane ka projek ka shong dor palat T.6 klur.
Hadien ka jingtohkit, ka ïingbishar jong ka Lokayukta ka la mudui pyrshah ïa 9 ngut ki dkhot EC barim jong ka GHADC, 2 ngut ki kontraktor, u Sanjay Sangma bad Principal Secretary barim ka GHADC.
Nalor katei ka jingtohkit, la bud sa ka jingujor na u nongtrei mon sngewbha, u Kingstone B. Sangma. Ïa katei ka MDC Hostel, la bei tyngka da ka Sorkar Pdeng.
Kumban shu kdew hangne, ka Sorkar ka la thung ïa 4 ngut ki IO ka Lokayukta ki ban bujli ïa ki 3 ngut kiba shah weng kam ha u bnai ba la dep.
U Chairperson ka Lokayukta, Bah Bhalang Dhar halor ka jingai jingmut ka Sorkar Jylla u la thung ïa u Bah Israel W. Ingty kum u Director ka Inquiry Wing lem bad lai ngut ki dkhot – Challang G. Momin, John Clitzer bad Banïateilang Diengngan.
