Shillong, K’lyngkot 16
Ka long shisha ka khubor kaba sngewtynnad ban tip ba uwei u rangbah na ka shnong Pomlakrai, East Khasi Hills District bad uba don san ngut ki khun u la lah ban bsa ïa ka ïing ka sem tang da kaba die sohniamtra harud surok kaba don harum ka Mawroh PHC ban leit sha NEHU bad Mawlai Bypass.
Une u rangbah ba la tip kyrteng kum u Phelbis Tariang u la trei ïa kane ka kam mynta la palat 11 snem kynthih da kaba sdang nyngkong ha jingkieng Wahumkhrah kaba don ha Wahingdoh. Naduh ba la shna bha ïa ka surok na Mawroh sha NEHU u la wan shong mynta la jan dap shi snem kynthih.
U Bah Tariang u la wanrah ïa u sohniamtra na ka shnong Ngunraw kaba don harum Mawkyrwat kaba hap ha South West Khasi Hills District. U ju die palat 40 bhar ha ka shisngi ha ka dor T.450 shi bhar kiba rit bad T.680 shi bhar kiba heh.
Kiba thied ïa u sohniamtra ba die da une u rangbah bun ki dei kiba ïaid lynti da ki kali kiba leit ba wan na Shillong sha Ri Bhoi namar ba ki ïaid lyngba ïa ka surok Mawlai Bypass.
Katba kiwei kiba die sohniamtra harud surok naduh FCI haduh khmat khyrdop ka shlem treikam MeECL kaba don ha Lumjingshai bad kiba shong harud surok hajan Wahumkhrah kim da ïaid tikna.
U Bah Tariang u la ïathuh ba u wan poi kumba 9 baje mynstep bad u leit phai 5 baje janmiet shwa ban kem dum namar kam shngaiñ da shong slem namar ka long kynjah.
U la pyntip ba ka por ban die ïa u sohniamtra ka dei naduh u Naiwieng haduh u Lber bad ha ka por ba la kut ka aïom sohniamtra u la die noh da ki sohmanir,sohplum bad kiwei jait soh.
U la ïathuh ba ki don ki sohniamtra kiba thiang kum na Wahkhen tangba kim lah ban shalan sha kiwei ki jaka namar kim lah pyndap ïa ki thaiñ lajong, nangta u sohniamtra na Mawphu bad Nongjrong kiba thiang.
U la ïathuh ba ki don ki sohniamtra kiba mih na jylla la shalan sha Bangladesh bad Assam.
