Shillong K’lyngkot 16
Ka Khun Hynñiew-trep National Awakening Movement (KHNAM) ka la dawa ban ai jingpynshai na ki bor ba dei khmih halor ka jingsaphriang ka dur khih (video) kaba pyni ba pynkhuid ïa ki pliang ja da u brut uba ki briew ki ju pyndonkam ban shut ha ki jaka leit bar.
Kumba ka paw, kane ka dur khih ka dei kaba la ring ha Tura ha ka por ba ki nongïalehkai bad kiwei ki dang ïa bam ja ha ka lympung Meghalaya Games 2024. Kane ka lympung ka la sdang ha ka Lah Sngi U Blei.
U Working President ka KHNAM u Bah Thomas Passah ha u kyrwoh khubor ha ka Sngi Ba-ar u la ong ba ka long kaba isaitmet bha ban ïohi ha ka dur khih kaba la saphriang kylleng ha kaba la pynkhuid ïa ki pliang ja da u brut ba ju sait ïa ki jaka leit bar bad ka lah ban buh ha ka jingma ïa ka koit ka khiah ki ‘thei bad ki ‘rang ïalehkai.
U la ong ba ka seng ka dawa ïa ka jingpynshai na ka sorkar bad kwah ban tip kaei ka jingpynshitom ïa ki briew kiba donkti ha kane ka kam.
Namar kata, u la ong ba ka seng ka la phah da ka jingujor sha ka tnat Food Safety ban shimkhia ïa kane, bad leh kham kloi ban tuklar mardor.
