Jowai, K’Lyngkot 16
Ka Narwan Multipurpose Co-operative Society Ltd kan pynlong da ka tamasa Sohniamtra kaba ar sngi ba la tip kum ka “Narwan Orange Festival” ha ka 30 bad 31 tarik Kyllalyngkot ha madan Mooknor Narwan, East Jaiñtia Hills District.
Ka shnong Narwan ka dei ka shnong kaba la paw bha ha ka jingrep ïa u sohniamtra. U sohniamtra ba mih na kane ka shnong u dei uba bang ba shngiam bad lah ruh ban ïoh kham slem haduh u Lber (March). Ki paidbah nongshong shnong ki im jakpoh da kaba rep soh bad kiwei kiwei de ki mar mariang.
Kum ban shu pynkynmaw ba u sohniamtra na kane ka shnong ruh u la poi sha Dubai da ka jingprat lynti jong ka sorkar lyngba ka tnat rep ka riang. Ka shnong Narwan kaba hap hapoh ka Sutnga Saipung Konstitwensi ka jngai 95 kilometer na nongbah Shillong bad 34 kilometer na nongbah Jowai.
Haba kren bad ki lad pathai khubor, u Waheh Shnong ka Narwan u Bah Lamsuk Langstang u la ong, ka jingpynlong ïa kane ka tamasa sohniamtra ka dei shibynta ba ki paidbah kin ïohlad ban wan jngoh da lade ïa ki bri soh kiba don da ki phew snem mynshwa ha ka shnong Narwan bad ruh ban pynithuh ïa ki jaka kiba itynnad kiba don sawdong sawkun kane ka shnong.
Na ka liang u Bah Leo Shadap, Secretary ka Shnong Narwan u la ïathuh, ha ki ar sngi jong ka tamasa sohniamtra yn don shibun ki jait pynbyrngia ïa ki paidbah kynthup ki jingrwai na ki nongrwai bad kynhun ba paw ka District bad Jylla.
Ha ka sngi sdang kata ha ka 30 tarik yn don ka Marathon, ka prokram jinghikai shaphang ka jingsniew jong u drok, ka jingïaid kjat (trekking), ka jingpyni paidbah ïa ka phlim NUKSA, Fashion Show bad ki jingrwai jingtem.
Ha ka sngi ba bud ka 31 tarik kan don ka Cycle Racing, ka jingleit jngoh ïa ki bri sohniamtra, ka jingïakop khoh bad bam sohniamtra, kan don ruh ka jingïakop Miss Narwan Orange Festival 2024 nalor kiwei kiwei ki jait pynbyrngia.
