Tura, K’Lyngkot 16
Ka Organising Com-mittee jong ka lympung 5th Meghalaya Games ba kynthup ïa ki heh na ka tnat ïalehkai bad ka Meghalaya State Olympic Association (MSOA) ka la kubur ïa ki jingud jingnam ha kaba ïadei bad ka bam ka dih ba ai sha ki nongïalehkai ha kane ka lympung kaba dang ïaid mynta ha Tura.
Ha u kyrwoh khubor, ka MSOA ka la pyrshang ban pyni daw. La ong ba ka dei ka sien banyngkong ba la pynlong ïa ka lympung Meghalaya Games kaba heh kumba ka long mynta bad ka dei ruh ka sien banyngkong ba la pynlong ha Tura.
La ong ruh ba la dep ban shna ïa kiba bun ki jaka shet bad jaka bam na ka bynta ban pynbiang ïa ki nongïalehkai. Ha ka sngi plie ïa kane ka lympung kaba la long ha ka Lah Sngi U Blei ha kaba ka President ka Ri ka la wan, ka MSOA ka la ong ba la buh ar jait ki synduk jingbam na ka bynta ki nongïalehkai ha madan, hynrei namar ka jingslem na ka daw jong ka jingbun ki jingkhanglad, ki la don ki nongïalehkai kiba la pynpaw ba ka bam ka duna, hynrei ïa kane la pynbeit noh da ki bor ba dei khmih.
Nalorkata, la ong ruh ba mar ïa dep ka jingplie ïa ka lympung, la plie noh ïa ki jaka bam ha ka por 7 baje janmiet.
Na ka liang u Bah John Kharshiing, Working President ka MSOA, u la ong, “Nga sngewthuh ba ki lah ban don katto katne kiba la mad jingeh bad ka Organising Committee ka sngewsih jur halor kane. Hynrei ngi la dep ban pynkhreh ïa baroh ki jaka bam na ka bynta ki nongïalehkai bad la ai ruh da ki jingbam kiba tei ïa ki. Ngi la shim ïa sienjam ban teh lakam ïa ki jingduna bad ngin dang ïai shimkhia na ka bynta ka bit ka biang jong ki nongïalehkai.”
