Shillong, K’lyngkot 16
Ka President ka la shu ïaroh beit ïa ki paid riewlum ka Meghalaya haba ka ai jingkren ha Mawphlang ha ka jingwan jngoh jong ka ha ka sngi Ba-ar bad ka la kham kren bha shaphang ka mariang bad ka jingpynneh ïa ki khlaw ki btap.
Hapdeng ka jingdait thah ka suiñbneng bad jingbeh ka lyer khriat, ka President ka la wan poi ha Mawphlang ha ka por 3 baje janmiet hadien ba ka la wan na Rilum Garo.
Tang mar ïa poi ha Mawphlang, la pdiang sngewbha nyngkong ïa ka President ha Khasi Heritage Village bad ka la don hangtei kumba 10 minit ei ei. Hadien kane, ka la wan hiar sha madan ba ïalum ki paidbah bad ai jingkren lyngkot hadien ba la ïoh ïa ka jingkren pdiang sngewbha na u Symbud Myntri Rangbah u Bah Prestone Tynsong, ka jingkren na u Myntri ka tnat jngohkai u Bah Paul Lyngdoh bad ka jingkren na u Myntri Rangbah u Conrad K Sangma.
Ka President ka la ong ba naduh kulong kumah, ki riewlum kane ka thaiñ ki la long lypa ki nongri nongsumar ïa ka mariang bad pynneh pynsah katkum ka jingtip tynrai kaba don ha ki, ka jingpynneh ïa la ka lariti bad jingngeit niam.
Ka President ka la ong ruh ba ki briew ha Meghalaya ki ngeit ruh ha U Basa uba shong ba sah ha ki khlaw ba jyrngam bad ki dustur kiba ki riewlum ki bud ki lah ruh ban long ruh kiba biang ban pule kumno ka don ka jingïadei hapdeng ki briew bad ka mariang.
Ka la ong ba ka rukom long rukom ki riewlum ka nohsynñiang ruh haba ïadei bad ka jingkyntiew ïa jingpynneh pynsah ïa ki khlaw ki btap bad ka jingleh kaba don ka jingbiang lang ha ka liang ka mariang.
Ka la ïaroh ruh ïa ka ‘law kyntang ha Mawphlang ba ka dei kaba paw bad kaba la pynneh pynsah kyrpang katkum ka jingstad kaba la don naduh ka por barim.
Ka President ka la kren ruh shaphang ka bynta jong ki kynthei ban pynneh pynsah ïa ka jinglong ka suiñbneng bad ka la ong ba ki kynthei ha ki jaka riewlum ki don ka jinglong kaba pyni lynti ban ïada ïa ka mariang bad sam lem ïa ka jingtip bad ka buit kumno ban lah ban ïakhun ïa ki jingeh.
Shuh shuh ka President ka sngewkmen ruh ban tip ba ka Meghalaya ka la kut jingmut ban long ka Jylla kaba lah ban long ka nongmuna bad shim ki lad ki lynti ban ïaid katkum ka jinglong kaba mynta bad ka tynrai.
Ka la ong ba ka Meghalaya ka bna nam ruh ha ka jingpynmih ïa u shynrai Lakadong, bad sohshan (strawberry) kiba jur bha ka jingdawa na kylleng ban pynïaid ïew.
Ha kane ka sngi, ka plie ïa ki surok kiba la shna pynneh kiba kynthup ïa ka surok Rongjeng Mangsang Adokgre bad Mairang-Ranigodown-Azra kumba T.200 klur nalor ka jingbuh mawnongrim ban tei ïa ka projek Shyllong Peak Ropeway kaba T.138 klur nalor ka jingtei ïa ki jaka sah ban kyntiew ïa ka kam jngohkai ha shnong Kongthong, Mawlyngot bad Kudengrim.
Na ka liang u Myntri Rangbah u la pynpaw ka jingsngewnguh ïa ka President kaba la wan jngoh ïa ka Jylla bad sngew sarong ruh ba kum ka riewlum ka la poi sha ka kyrdan kum ka President kaba nyngkong napdeng ki riewlum.
U la pynpaw ruh ka jingkmen ba ka Meghalaya ka ïoh khusnam ha ka ri na ka jinglah ban btin lynti bad plielad ïa ki nongshong ha ka liang ka seng kam seng jam.
