Nongstoiñ, K’Lyngkot:
Ha ka Sngi U Blei jong ka taïew, ka Nongstoiñ Diocese Catholic Youth Movement ka la ïoh ban pynkut noh ïa ka jingïalang kyrpang ki samla ïa kaba la tip ruh kum ka XV Annual Diocesan Youth Covention.
Ïa katei ka sngi kaba kyrpang la sdang naduh ka 12 tarik u Kyllalyngkot 2024 (Sngi Thohdieng) bad la pynkut ha ka Sngi U Blei, kumjuh ruh ïa katei ka jingïalang kaba kyrpang jong ki samla Balang Katholik jong ka Nongstoiñ Jyllaniam la pynlong ha Mother of Compassion Mawkhlam Parish.
Ha katei ka sngi pynkut ïa ka Convention, ha ka por 9:30 mynstep la ïoh ban pyndep ïa ka jingkñia lehniam ïa ka Mass Bakhuid da u Most Rev Wilbert Marweiñ Bishop ka Nongstoiñ bad la ïoh ban sam ruh ïa u Kpu bad ka Waiñ jong ka Sakrament Bakhuid sha kiba ngeit.
Nangta, ha ka jingïaseng nohphai sngi pat la ïoh ban pyndep ïa ka Jingmane Sakrament Bakhuid da u Fr. Alfred Lyngdoh Nongbri St. Xavier’s Minor Seminary Upper Shillong.
Ha katei ka sngi la ïadonlang ruh u Rev Fr. Nicholas Maïong MSFS Parish Priest ka Mother of Compassion Parish Mawkhlam, u Fr. Joby Mathew, u Alvin Savio Kharkongor uba la wan na Shillong, President ka SACYM, ki phadar na nongbah Tura ki sister bad kiwei kiwei.
Shuh shuh ha kine ki sngi ba kyrpang la don ruh ka jingïalehkmen da ki jingpynbyrngia bapher bapher, ka jingai jinghikai lyngba ka Ktien jong U Blei bad ki seminar.
U Bishop haba sam ïa ka Ktien jong U Blei, u la ïoh ban pharia ruh da kaba u la ong, “Ba ka met jong phi ka long ka Temple jong U Blei, kumno samla phin leh ban lait na ki jingpynjakhlia ïa ka ïing U Blei, hato phi ïohsngew ne em ïa ka sur jong U Blei kumba u Samuel u la ïohsngew bad u la pynleit jingmut ban shah shkor bha ïa ka jingkhot, ka jingkohnguh ïa la ki kmie ki kpa ruh ka dei ka jingkohnguh bad ka jingpynsngewbha ïa U Blei.
