Nongpoh, K’Lyngkot 16
Ka Federation of Khasi Jaiñtia & Garo People (FKJGP) Ri Bhoi District ha ka Sngi Ba-ar ka la hiar ban leit jurip ïa ka jaka jong ka Meghalaya Mineral Development Corporation (MMDC) Limited kaba don hapoh ka shnong Mawsmai, Ri Bhoi District halor ka jingkynnoh ba ïa katei ka jaka la aiwai sha u riewshimet na ka Assam ban tei ïa ka Resort bad ka Petrol Pump.
Ha ka jingleit jurip jong ka seng hapoh ka jingïalam u Bah Luistar Lyngdoh kum President, Bah Lumlang Mawnai kum Senior Vice President lem bad kiwei kiwei ki dkhot, ka la lap ba ka la don ka jingtih pynmadan ïa katei ka jaka da u riewshimet uba dei na ka jylla Assam kaba la ïaid shaid-shaid bad pynlyngngoh bad pynsngewkhia shikatdei ïa ka seng.
Ban pynthikna halor kane ka bynta, na ka liang ki nongïalam ka seng, ki la leit kynduh ruh ïa u Rangbah Shnong ka Mawsmai, uba la pyntip ba na ka liang ka shnong ka la dep ban ai jingbit lane kata ka No Objection Certificate (NOC) na ka bynta ban tei ïa ka Resort bad ka Petrol Pump ha katei ka jaka jong ka MMDC.
Haba kren sha ki lad pathai khubor hadien ka jingjurip, u Bah Luistar Lyngdoh u la pynpaw ba kum ka seng hi ka dap da ka jingsngew lyngngoh bad sngewkhia jur ban ïohi ba ïa katei ka jaka sorkar la aiti sha u bar jylla, kaba la pynlong ïa ka seng ba kan pyrshah da kaba ong ruh ba katei ka jaka jong ka sorkar ka la dei ban ai sha ki trai jylla ym sha ki bar jylla.
U Bah Luistar u la buh jingkylli ruh balei ka sorkar jylla ka kwah ban aiwai ban pyndonkam ïa katei ka jaka sha u briew uba nabar ka jylla, haba bun ki trai jylla ruh ki lah ban trei ïa katei ka kam? U Bah Luistar u la ai jingmut ruh sha ka sorkar ba ka la dei ban tei da ka jaka pule lane ka jaka sah (Hotel) ïa ki paidbah ha katei ka jaka naba ka don marjan bad ka jaka ai jingsumar jong ka jylla Assam, ka North East Cancer Hospital & Research Institute (NECHRI) kaba bun na ki paidbah ka jylla ju leit ban sumar.
Shuh shuh une u nongïalam ka FKJGP u la ong ba ka seng hi kan ym shongthait bad shong kli-kti halor katei ka kam, hynrei kan pyrshah bad ïaid shakhmat ban nym ailad ba katei ka jingthmu jong ka sorkar kan urlong, da kaba bynrap ruh ba kum ka seng hi kan dang buddien ban lap ïa ki jingshisha ïoh ka don ruh kano-kano ka jingleh rieh leh bakla da ki bor ba dei khmih ka sorkar.
