Shillong, K’Lyngkot 16
Ka Voice of the People Party (VPP) ha ka Sngi Ba-ar ka la leit ban buh da ka ejahar ha shlem treikam u Superintendent of Police, East Khasi Hills halor ka jingkynthoh khlemakor jong uwei u briew pyrshah ïa u President ka seng, Bah Ardent M. Basaïawmoit ha ka rynsan lad pathai ‘Facebook’.
“Ngi la wan sha ophis u SP ban ujor ejahar halor kawei ka jingthoh kaba la thoh da ka ‘Account’ jong uwei u briew ne ka briew ba la ai kyrteng ‘Vpp Dent Vpp Dent’ bad ïa kane ka jingthoh la pynsaphriang ha kawei ka kynhun kaba la tip kum ka ‘KA LYMPUNG KI KHUN KA RI’ ha ka rynsan lad pathai ‘Facebook’,” ong u dkhot ka Media Cell ka VPP, Dr. Rusievan Shangpliang haba kren sha ki lad pathai khubor.
Halor katei ka jingthoh kaba la thoh pyrshah ïa u MLA ka Nongkrem, Bah Ardent M. Basaïawmoit, uba dei ruh u President ka VPP, u Dr. Shangpliang u la ong ba ka seng ka la shimkhia ïa katei ka kam bad kumta ka la wan ban ujor da ka ejahar ha ophis u SP.
“Ka jingthoh ka la long shaba palat ha ryngkat ki ktien ba khlemakor kaba la pynthohbria ïa ka longrynïeng jong i. Ym tang katta, ka la ktah matïong ruh ïa ka ïing ka sem jong i, ïa ka konstitwensi, ka seng bad ïa ka ri baroh kawei,” u la ong.
Utei u nongïalam u la ïathuh ruh ba watla kim shym la ïakynduh ïa u SP namar u don hapdeng ka kam na ka jingwan ka President ka India, hynrei ki la ïoh ban aiti ïa ka shithi bad la pdiang ruh ïa ka.
Ka seng ha kajuh ka por ka kyrmen ba ka tnad pulit kan leh ïa kaba donkam bad wad ïa kitei ki briew kumjuh ban pynshitom ïa ki katkum ki kyndon jong ka aiñ.
Ïa katei ka jingthoh la pynmih ha ka 14 tarik mynta u bnai bad hadien kane, ka seng mar-mar, ka la shong jingïalang ha ka sngi ba bud hashuwa ban ujor ejahar ha ka Sngi Ba-ar.
“Ka seng ka kyntu ïa ki paidbah ba lada phi don kano-kano ka jingsngew ba phi dei ban kynthoh la ka dei ïa ki nongmihkhmat ne ïano-ïano, phim dei ban pyndonkam ïa ki ktien ba khlemakor bad ba ktah matïong ïa ka jingim jong ki namarba ki briew kiba trei ïa ki kam paidbah ki lah ban mih shakhmat ban trei na bynta ka jingbha,” u la ong.
Ha kawei ka liang, u Dr. Shangpliang u la ong ba ka jingkynthoh ha katei ka rukom kam long kaba dei satia bad kumta ka seng ka kyntu ïa ki paidbah ba nangne shakhmat ba kin da phikir haba ki thoh ïa kino-kino ki jingthoh.
Shuh shuh ka seng ka kyntu ïa ka tnad pulit bad bor Sorkar ban peitngor haba ïadei bad ka jingpyndonkam jong ki briew ïa ki rynsan lad pathai.
“Hooid ki rynsan lad pathai ki ïarap ha kiba bun ki liang ban pynpaw kiei-kiei, hynrei ban ktah shimet pat ne ban kynthoh ïa ka bym dei, kam dei ka rukom bad kumta ngin hap phikir ha kane ka bynta,” u la bynrap.
