Shillong, K’Lyngkot 17
Ka Voice of the People Party (VPP) ha ka Sngi Balang ka la pynbna ba kan leit shnong hakhmat Secretariat ha ka Sngi Thohdieng namar ka jingkuman jong ka sorkar MDA-II ba la lamkhmat da u Conrad K. Sangma ban pynrung kam biang ïa ki ophisar jong ka Meghalaya Lokayukta kumba la dawa da ka seng.
Ha u kyrwoh khubor, u nongaiktien ka VPP, u Dr Batskhem Myrboh, u la ong ba ka jingleit shong hakhmat ka Main Secretariat ha ka Sngi Thohdieng kan sdang ha ka por 10 baje mynstep bad kan kut ha ka por 4:30 janmiet. Hynrei, ka jingïakhih kan bteng biang ha ka Lah Sngi U Blei, 22 tarik Kyllalyngkot, 2024, lada ka sorkar ka dang pyneh ryndang.
“Ka jingweng kam jubor ïa ki ophisar jong ka shlem Meghalaya Lokayukta kam long ka jingñiew dewthala tang ïa ki, hynrei ka dei ka jingñiew beiñ ïa baroh ki nongshong shnong jong ka jylla. Kumta ka dei ka kamram jong baroh ki paidbah kiba dang don ka jingpyrkhat ïa ka imlang sahlang ban ïasnoh kti lang ha kane ka jingïakhih,” la ong u Dr Batskhem.
Ha kajuh ka por, ka VPP ka la kyntu ïa baroh kiba wan ban snoh kti lang ha kane ka jingïakhih ba kin long kiba jai-jai bad ban nym wanrah ïa ka jingkulmar. Lada don mano-mano ba pynmih jingkulmar, ka VPP kan nym don ka jingkitkhlieh, la bynrap u Dr Batskhem.
Lah ban kdew ba ha ka Sngi Ba-Ar ka VPP ka la aipor 24 kynta ïa u Conrad ban thung kam biang ïa ki ophisar kiba la shah weng kam na ka Meghalaya Lokayukta, hynrei ka sorkar ka khlem pynurlong ïa kane ka jingdawa.
