Nongstoiñ, K’Lyngkot 17
Ka jingkieng ba la thmu ban shna lyngba ka wah Phodthre na shlem trei-kam Irrigation sha Tiehsaw kaba la sdang naduh ki 20 snem mynshwa kat haduh mynta ka la shu sahkut kumto khlem pyntrei shuh da kaba pynïeng tang uwei u païa.
Namar ka jingbym pyntrei shuh mynta da ki phew snem, ka la pynlong biang ïa ka seng Hynñiewtrep National Youth Movement (HNYM) West Khasi Hills ha ryngkat ka jingïadonlang ki nongïalam shnong ha ka Sngi Balang ka taïew ka la leit ban hiar leit jurip biang bad buh ruh da ka jingthoh sha u Executive Engineer ka tnat PWD Nongstoiñ ban dawa shimkhia noh mardor bad leh eiei na ka bynta katei ka jingkieng.
Na ka liang ka ka HNYM ka la dawa ruh na ka tnat PWD ba kan ai jingpynshai na kaei ka daw ba katei ka jingkieng ka la shu sahkut kumto haduh mynta.
Lah ban kdew hangne, kane ka jingkieng ka don ïa ka jingjrong haduh 18.75 meter kaba la dep mang pisa da ka Sorkar naduh ka por ba pynlong ïa ka jingïaseng KJP Assembly kaba nyngkong kaba la long ha ka Balang Presbyterian New Nongstoiñ, hynrei kaba sngewsih ka long ba haduh mynta la ïohi tang uwei u païa.
U President ka HNYM West Khasi Hills, Bah Tailanstar Lyngkhoi, u la ong ba halor katei ka jingkieng, ka HNYM ka kyntu jur ïa ka tnat PWD ba ka dei ban shimkhia noh mardor. Nalor nangta, u la ïathuh ba ha ka jingïakren bad u Executive Engineer u la ïathuh ba na ka liang jong u, u la kular ba un sa shimkhia ban khmih bniah kaei ka daw ba katei ka jingkieng ka la shu sahkut kumto.
Shuh shuh u Bah Tailanstar u la ïathuh ba u EE u la ïathuh ruh ba na ka bynta katei ka jingkieng, ka tnat PWD ka la dep ruh ban phah biang ïa ka jingtyrwa hynrei wat la ka HNYM kan nang ïai buddien ba katei ka jingkieng ka dei ban urlong bad pyndep noh.
