Shillong, K’Lyngkot 17
U Bah A.L Hek uba dei u nongïalam ka BJP ha Meghalaya bad ruh u Myntri ka Sorkar Jylla, u la ong ba kane ka jingwan ïuh kjat biang jong u Myntri ka tnat Kam Pohïing ka ri u Amit Shah hapoh ka jylla, ka BJP ka don jingthmu ban pynkynmaw biang ha u halor ki mat ba dang sahteng ka jylla.
Ki mat kiba dang sahteng jong ka jylla kiba la dep ban buh hakhmat ka Sorkar Kmie ka long ban pynrung noh ïa ka ktien Khasi bad Garo ha ka Khyrnit kaba Phra jong ka riti synshar ka ri bad ban pyntreikam noh ïa ka Inner Line Permit (ILP) ha ka jylla.
“Lada ngi ïoh ïa ka lad ban ïakynduh ïa u Amit Shah, kum ka seng ngin pynkynmaw biang halor ka resolution ba la mynjur da ka ïingdorbar thawaiñ ka jylla ban pynrung noh ïa ka ktien Khasi bad Garo ha ka Khyrnit kaba Phra jong ka riti synshar ka ri bad ban pyntreikam noh ïa ka ILP hapoh ka jylla,” ong u Bah Hek.
Shuh shuh haba kren bad ki lad pathai khubor ha ka Sngi Balang, u Bah Hek u la ong ba kine ki mat ki dei kiba kongsan tam na ka bynta ka jylla baroh kawei.
Halor ka jingsngap jar ïa ka jingdawa ILP, u Bah Hek u la ong, “Ki bun palat kiba hap ban leh hapoh ka ri bad ki bun kiba dei ban leh na ka bynta ka Meghalaya ruh, kumta shwa ban shim ïa kano kano ka rai, ki hap ban bishar bniah bha, la kan ai jingmyntoi ne kan pynduhnong bad kane ka long laba donkam bha ban ïatai”.
U la ong lada ïakynduh ïa u Amit Shah, ka BJP Meghalaya kan ïakren ha kaba ïadei bad ka North Eastern Council (NEC) kaba peit ïa ka Meghalaya bad ïa ki jylla baroh jong ka thaiñ shatei lam-mihngi, ba kan theh kham bun ïa ki kam pynroi ha ka liang ka kam jngohkai.
“Ngin kyrpad ban ai skhim kyrpang ïa ka Meghalaya ha kaba ïadei bad ka kam jngohkai khnang ba yn lah ban kyntiew shuh shuh ïa ka kam jngohkai ha ka jylla,” ong u Bah Hek.
U la ong ba yn ïakren ruh ïa ki skhim kiba ïadei bad ka kam jngohkai kiba la phah da ka sorkar jylla lyngba ka tnat jngohkai bad yn kyrpad ïa u Myntri ka sorkar pdeng ba lyngba ka ophis jong ka NEC ba kan ïarap ha ka ban kyntiew ïa ka kam jngohkai ha ka jylla Meghalaya bad ha ka thaiñ shatei lam-mihngi.
