Shillong, K’lyngkot 17
Ka Hynñiewtrep Achik National Movement (HANM) kan sa leit ban pynlong biang ïa ka jingïakhih paidbah ha nongbah Delhi hadien ba la kut ka ilekshon MP Lok Sabha ynda la thaw da ka sorkar kaba thymmai ban pynurlong ïa ki lai tylli ki mat jong ka jaidbynriew.
Kum ban shu pynkynmaw, ka HANM ka la leit ïakhih sha Jantar Mantar ha nongbah Delhi ban dawa na ka sorkar India ban ithuh noh ïa ka ktien Khasi, ban pynbeit ïa u pud u sam bad ka sorkar Assam bad ban pyntreikam ïa ka Inner Line Permit.
Ha kane ka jingleit ïakhih kaba long ha ka 3 tarik Naiwieng 2023 ha nongbah Delhi, ka jinglut jingsep ka la poi palat phew lak lada kheiñ ka bai liengsuiñ, bai rel, bai bam, bai sah bad kiwei kiwei haba ki dkhot ka seng kiba la poi palat 200 ngut.
Hynrei haduh mynta ka HANM ka dang sahram sa kumba shi lak tyngka tam eiei ba kan siew dep noh na ka jinglut haba ki leit ïakhih sha Delhi.
Haba ïoh ban ïakren kyrpang bad u President ka HANM Sengkmie, Bah Lamphrang Kharbani, u la ïathuh ba ka seng kan sa leit ban ïakhih biang sha Delhi hadien ba la kut ka ilekshon MP Lok Sabha namar mynta da leit ïakhih kam don jingmut shuh haba baroh ki MP ki la bun kam sa ban pynkhreh ïa ka ilekshon ha kine ki bnai ban wan.
U la ong ba lada ka sorkar kaba thymmai ka ban ïalam ïa ka ri India kam pynurlong, ka seng kan leit ïakhih biang.
U la ïathuh ba ka seng kan sa leit ïakhih ha ki jaka paidbah ban da ïoh sngew syndon haduh ki shkor jong ka Sorkar India.
U la pynpaw ka jingsngewkmen ba ha ka jingïakhih kaba nyngkong ha Jantar Mantar ha Delhi ka Sorkar India lyngba ka Home Ministry ka la ai ïa ka jubab ïa ki mat ba ka seng ka la buh.
Haba kylli kaei ka jingïapher haba ïakhih sha Delhi bad ha Shillong, u Bah Lamphrang u la ong ba lada ïakhih ha Shillong ka jingïatyngkhuh kaba nyngkong bad ki pulit namar kin shu wan ban pynsangeh namar kan ktah ïa ka ïaid ka ïeng jong ki paidbah, katba ha Delhi ki ophisar jong ka Sorkar India ki da wan ha jaka jingïakhih ban sngap ïa ka jingdawa, katba ha Shillong ym don ophisar ban wan mih lait noh tang ki magistrate.
Nalor kata, u la pyntip ba ka jinglut ka long palat phew lak tyngka hynrei namar ka jingmyntoi jong ka jaidbynriew, la ïa synñiang ki para dkhot kat haduh ban da poi ka jingïakhih shaduh Delhi, tangba ka seng haduh mynta ka dang sahram sa kumba shi lak tyngka.
Haba kylli biang ka seng ka don ne em ka jingthmu ban leit pynsngew ïa kine ki mat jingdawa ha ki seng saiñ pyrthei haba ki pynkhreh ïa ka ilekshon MP, u la ong ba ka seng kan sa leit pynsngew ynda ki paidbah ki la dep jied namar ka seng kam kwah ban leit pynsngew lypa haba mynta ki dang pynkhreh ban ïakhun ïa ka ilekshon.
