Shillong, K’Lyngkot 17
U Bah Mariahom Kharkrang uba dei u nongaiktien jong ka Bharatiya Janata Party (BJP) Meghalaya Unit, u la ong ba ïa ki mat kiba kynthup ïa ka jingdawa ban ïoh Inner Line Permit (ILP) hapoh ka jylla bad ka jingdawa ban pynrung ïa ka ktien Khasi ha ka Khyrnit Baphra kan kham long kaba suk ban ïoh lada ki kyrtong ki dei napoh ka seng.
Haba kren sha ki lad pathai khubor, u Bah Kharkrang u la ong ba haba don ha kano-kano ka seng ruh kaba bat ïa u lakam synshar, lada ka seng ka khynñiat ïa kita ki mat jingdawa, la tikna ba ki nongïalam napoh ka sorkar pdeng ruh kin kham sngap bha ïa kita kaba ïadei pat bad ki kyrteng jong ki kyrtong ki ban ïakhun ha ka ilekshon MP na Shillong Parliamentary Constituency, u Bah Kharkrang u la ong ba ka seng kan hap ban peit ïa ki kyrtong kiba don jingkyrmen ban ïoh ïa ka jingjop. U la ïathuh ba ki la don lai ngut kiba la pynpaw ïalade ba ki kwah ban ïakhun ïa katei ka ilekshon na ka tiket jong ka BJP.
Wat la ha ki khyndiat sngi kiba la dep, la ïohi ba na ka liang jong ka Dr. Fenela L. Nonglait ka la pynpaw ba kan ïakhun ïa katei ka ilekshon MP na ka seng BJP, hynrei na ka liang u Bah Kharkrang u la ong ba ym tang ka Dr. Fenela kaba la pynpaw ïa ka jingkwah ban ïakhun ïa ka ilekshon MP na ka tiket jong ka BJP, pynban ki la don ruh pat kiwei-kiwei kiba la pynpaw ïa kane kajuh ka jingkwah ban ïakhun ïa kane ka ilekshon.
“Ngi hap ban peit ïa ki kyrtong kiba don jingkyrmen ban jop bad ban poi sha ka thong, kumta ngin sa phah ïa kine ki kyrteng sha ki nongïalam sha Delhi na ka bynta ka jingïoh jingmynjur bad ki nongïalam na Delhi kin sa rai uno ne kano ka kyrtong kaba long kaba bit ban pynïeng ba pynïakhun”, la ong u Bah Kharkrang.
U la ong ba kiwei-kiwei ki kyrtong ruh kiba kwah ban ïakhun ïa ka ilekshon MP ki la pynpaw ba lada kim ïoh ïa ka tiket na ka BJP ruh kim sngew eiei bad kim ïakhun shuh bad kita kiba pan tiket ruh ki dei ki nongtrei jong ka seng hi.
U Bah Kharkrang u la ong ruh ba kiba la pynpaw ban ïakhun ïa katei ka ilekshon ki don kumba 2-3 eiei ha kaba ar ngut ki dei shynrang bad kawei ka kynthei.
